Jóhanna Sigurðardóttir forsætisráðherra. mbl.is/Árni Sæberg

„Ég geng nú ekkert út frá því að við getum ekki haldið áfram í frekari lækkun vaxta,“ sagði Jóhanna Sigurðardóttir forsætisráðherra í óundirbúnum fyrirspurnartíma á Alþingi í dag.

„Það sem þarf fara í og seðlabankinn er að vinna að eru gjaldeyrishöftin. Það er næst á dagskránni að skoða hvernig hægt er að fara í þau. Það hefur auðvitað mikil áhrif hvernig það verður gert. Ég hef fulla trú á því að það sé hægt að setja fram skynsamlega áætlun í þeim efnum, eins og seðlabankinn er að vinna að,“ segir Jóhanna.

Bjarni Benediktsson, formaður Sjálfstæðisflokksins, spurði Jóhönnu út í hvort hún væri sammála því mati Seðlabanka Íslands hvort það væri, við núverandi aðstæður, ekki tilefni til að lækka vexti frekar. „Sannarlega er það svo, að jákvæðir raunvextir eru ekki til þess fallnir að aðstoða atvinnulífið eins og það hefur svo mikla þörf fyrir í dag.“

Jóhanna segir ljóst að Seðlabanki Íslands hafi farið mjög hratt í stýrivaxtalækkun á undanförnum mánuðum. Það sé ótrúlegt að á tveimur árum hafi stýrivextirnir lækkað úr 18% niður í um 4%.

Hún segir að það hafi komið fram í máli seðlabankastjóra að það sé engin vissa fyrir því að stýrivextir muni lækka frekar. „Ég tók það sem svo að hann væri ekki að slá því föstu að svo væri,“ sagði Jóhanna og það færi eftir ýmsum þáttum í efnahagslífinu.