Matvælastofnun vinnur að því í samvinnu við innflytjendur og heilbrigðiseftirlit sveitarfélaga, við að finna furuhnetur, sem valda óbragði í munni og fjarlægja þær. 

Fram kemur á vef stofnunarinnar, að fjöldi tilkynninga hafi borist í gegnum viðvörunarkerfi Evrópu um matvæli og fóður  og einnig frá Bandaríkjunum frá árinu 2009 um furuhnetur sem geta brenglað bragðskyn og valdið óbragði í munni í allt að fjórar vikur eftir neyslu.

Matvælastofnun fjallaði um þessar hnetur árið 2009 og sagðist þá hafa haft af þeim spurnir á markaði hér. Bragðáhrifin, sem þær valda, lýsa sér í minnkuðu bragðskyni og málmkenndu, bitru eftirbragði í munni sem hefst 1-2 dögum eftir neyslu furuhneta og hverfur oftast innan nokkurra daga.

Grunur leiki á að tvær tegundir furuhnetna, Pinus armandii og Pinus massoniana, sem fundist hafa í blöndu af furuhnetum, séu orsakavaldur en þær séu ekki taldar hæfar til manneldis. Talið sé að umræddar hnetur eigi uppruna að rekja til Kína. Hægt sé með mælingum á fitusýrusamsetningu hnetnanna að greina á milli ætilegra og óætilega tegunda. 

Þeir sem verða varir við brenglað bragðskyn eftir neyslu á furuhnetum eru beðnir um að setja sig í samband við Matvælastofnun eða heilbrigðiseftirlit viðkomandi svæðis.  

Vefur Matvælastofnunar