mbl.is/Ómar

Björn Zoëga, forstjóri Landspítala, segir að mikið annríki hafi verið á Landspítalanum, líkt og oftast sé á þessum árstíma. „Ég hef tekið eftir því að margir starfsmenn eru orðnir langþreyttir,“ segir hann í föstudagspistli sínum, sem er birtur á vef spítalans.

Hann tekur fram að starfsfólk spítalans hafi staðið sig frábærlega vel á þessum álagstíma eins og venjulega.

„Það þarf varla að nefna það enn og aftur að spítalinn hefur þurft að draga saman seglin seinustu tvö árin, samdráttur upp á rúmlega 18%. Við höfum breytt klínískri starfsemi til að viðhalda öryggi sjúklinga og reyna að skerða þjónustuna sem minnst. Það segir sig sjálft að við svona aðstæður þreytist starfsfólk fyrr. En vonandi fara að koma léttari tímar, bæði innan og utan spítalans,“ skrifar Björn.

Þá fjallar hann um sameiningu Landspítalans og St. Jósefsspítala í Hafnarfirði, en sjúkrahúsin sameinuðust 1. febrúar.

Hann segir að það sé mikilvægt á þessum tímamótum að allir starfsmenn reyni að vinna saman að því verkefni að samhæfa og tengja saman starfsemina sem hafi verið á St. Jósefsspítala  og starfsemi Landspítala, óháð því hvar sú starfsemi fari fram. Það sé einnig mjög mikilvægt að taka vel á móti nýju starfsfólki Landspítalans, fyrrverandi starfsfólki St. Jósefsspítala.  Margt af því þurfi nú að vinna við mjög breyttar aðstæður og sumt við önnur verkefni en áður.

Björn Zoëga, forstjóri Landspítalans. mbl.is/Golli