Jóel Færseth Einarsson kom heim til Íslands í gærkvöldi. Myndin var tekin þegar hann varð tveggja mánaða.

„Það er ólýsanleg tilfinning að vera kominn heim,“ sagði Einar Þór Færseth, faðir Jóels Færseth. Jóel litli kom í fyrsta sinn heim til Íslands í gærkvöldi ásamt foreldrum sínum, þeim Einari Þór og Helgu Sveinsdóttur. 

„Við þrjú erum öll í skýjunum,“ sagði Einar. Rúmlega tveir og hálfur mánuður eru síðan þau Helga og Einar fóru til Indlands þar sem Jóel litli fæddist með hjálp staðgöngumóður.

„Jóel heilsast mjög vel, hann er sprækur og mjög hress og ánægður að vera kominn heim til sín,“ sagði Einar. Hann sagði að Jóel hafi ekki orðið meint af ferðalaginu og liðið mjög vel í báðum flugferðunum. Þau flugu fyrst frá Indlandi til Þýskalands og svo í gær frá Þýskalandi til Íslands.

Einar sagði að nú tæki daglega lífið við hjá þeim hjónum og með soninn að auki. „Það var draumurinn okkar,“ sagði Einar. „Það er mjög bjart framundan og dásamlegir tímar.“

En var þetta ekki erfitt á tímabili?

„Þetta var ansi erfitt rétt fyrir og í kringum jólin,“ sagði Einar. „Faðir minn lést og var jarðsettur rétt fyrir jólin. Það var aðallega það sem var erfitt.“ Einar greindi frá því í samtali við mbl.is 22. desember sl. að eftir ákvörðun Alþingis um að veita Jóel litla ríkisborgararétt hafi þau vonast til að komast heim í tæka tíð til að geta verið viðstödd  jarðarförina, en það tókst ekki.