Lögreglan á höfuðborgarsvæðinu stöðvaði 10 ökumenn fyrir ölvunarakstur og átta ökumenn fyrir að aka undir áhrifum fíkniefna um helgina. Langflestir voru stöðvaðir í Reykjavík.

Níu ökumenn, sem lögreglan hafði afskipti af vegna aksturs undir áhrifum áfengis, voru stöðvaðir í Reykjavík og einn í Hafnarfirði. Einn var tekinn á föstudagskvöld, fjórir á laugardag og fimm á sunnudag.

Þetta voru níu karlar á aldrinum 21-67 ára og ein kona, 45 ára. Tveir þessara ökumanna höfðu þegar verið sviptir ökuleyfi.

Af þeim sem óku undir áhrifum fíkniefna voru sjö stöðvaðir í Reykjavík og einn í Hafnarfirði. Einn var tekinn á föstudagskvöld, fjórir á laugardag, tveir á sunnudag og einn aðfaranótt mánudags.

Þetta voru fimm karlar á aldrinum 17-49 ára og þrjár konur en þær eru allar í kringum tvítugt. Tveir þessara ökumanna höfðu þegar verið sviptur ökuleyfi og einn var á stolnum bíl.