Meirihluti stjórnar Orkuveitu Reykjavíkur ákvað á stjórnarfundi í gær að ganga til samninga við Bjarna Bjarnason um að taka að sér starf forstjóra fyrirtækisins.  Bjarni er nú forstjóri Landsvirkjun Power en var áður framkvæmdastjóri orkusviðs hjá Landsvirkjun og þar áður framkvæmdastjóri Járnblendiverksmiðjunnar. Þar var Bjarni yfirmaður Helga Þórs Ingasonar, fráfarandi forstjóra OR.

Helgi Þór staðfestir þetta en segir þó enga þörf hafa verið á að hann stigi til hliðar í ráðningarferlinu þrátt fyrir þessi tengsl sín við Bjarna. „Það sóttu sextíu manns um og það var farið vel yfir hæfi og vanhæfi. Nefndin mat það svo að það væri ekki um vanhæfi að ræða í mínu tilfelli,“ segir Helgi Þór.

Gagnrýnir ráðningarferlið

Kjartan Magnússon, fulltrúi Sjálfstæðisflokksins í stjórn OR, lagði til að ráðningu forstjóra yrði frestað þar til borgarráð hefði tekið afstöðu til tillögu um að borgarlögmanni yrði falið að skoða ráðningarferlið og skilað áliti um hvort það samræmdist góðum stjórnarháttum.

Gagnrýnir Kjartan að stjórn fyrirtækisins hafi ekki fengið að taka þátt í ferlinu á öllum stigum þess. Því hafi tveir einstaklingar utan hennar að mestu leyti annast val umsækjenda án þess að hafa til þess umboð. Því hafi aðeins tveir umsækjendur af 60 hlotið eðlilega umfjöllun stjórnar. Þá hafi ekki verið litið til þekkingar og reynslu á sviði fjármögnunar fyrirtækja í úrvinnslu umsókna.