Íslenski matreiðslumaðurinn og veitingahúsaeigandinn Agnar Sverrisson ásamt samstarfsmanni sínum Xavier Rousset.

Eftir Jón Pétur Jónsson

Breski stjörnukokkurinn Gordon Ramsey segir að Íslendingurinn Agnar Sverrisson sé á meðal þriggja matreiðslumanna sem séu líklegir til afreka og vert sé að fylgjast með.

Ramsey segir þetta í viðtali við tímarit bandaríska flugfélagsins Delta, Delta Sky Magazine. Fyrirsögn greinarinnar er „3 Rock Star Chefs", eða „Þrjár matreiðslurokkstjörnur“.

Agnar, sem er eigandi veitingastaðarins Texture í London, segir í samtali við mbl.is að þetta sé mikill heiður.

„Hann [Ramsey] segir í öðru viðtali að Texture sé uppáhalds veitingastaðurinn sinn og hann hefur oft komið hingað. Hann er ekki mikið hér í London, en þegar hann er hérna þá kemur hann yfirleitt hingað til að borða,“ segir Agnar og bætir við að hann þekki Ramsey ekki neitt.

Agnar bendir á að það sé frábær auglýsing að fá meðmæli frá manni eins og Ramsey, sem sé stjarna í veitingahúsaheiminum. Að sögn Agnars hafa margir pantað borð á staðnum eftir að hafa lesið viðtalið. „Líka þegar hann sagði í desember, í öðru blaði, að Texture væri uppáhalds veitingastaðurinn sinn. Þá fengum við fullt af gestum strax,“ segir Agnar og bætir við að fólki hlusti greinilega á það sem Ramsey hafi að segja um veitingastaði og góðan mat.

„Hann veit alveg hvað góður og vondur matur er.“

Aðspurður segir hann reksturinn ganga vel og að í nógu sé að snúast. Sl. laugardag var Agnar gestur í matreiðsluþættinum Saturday Kitchen sem sýndur er í breska ríkissjónvarpinu (BBC One).

„Ég var í beinni útsendingu þar í um klukkustund, eða svo, og það eru yfir þrjár milljónir manna sem horfa á hann,“ segir hann og bætir við að allt hafi gengið vel þrátt fyrir örlítið stress.

Agnar segist hafa nýtt tækifærið til að auglýsa Ísland og íslenskar afurðir í þættinum. „Ég var með íslenskan þorsk, söl og ég veit ekki hvað og hvað. Við töluðum mikið um hákarl og þetta var voða gaman, og ég held að þetta hafi verið mjög góð kynning fyrir Ísland.“

Agnar opnaði Texture árið 2007 ásamt vínþjóninum Xavier Rousset. Staðurinn, sem sérhæfir sig í skandínavískri matargerð,  hlaut hina eftirsóttu stjörnu Michelin í fyrra, og er Agnar fyrsti íslenski matreiðslumaðurinn til að ná þessum áfanga. Hann segir að það hafi breytt mjög miklu fyrir staðinn sem hafi opnast fyrir nýjum hópi matgæðinga. Nú sé stefnan að næla sér í aðra stjörnu. „Það er alveg á hreinu,“ segir hann. 

Þeir Agnar og Rousset opnuðu nýjan stað í fjármálahverfinu í London sl. sumar, en staðurinn ber heitið 28 50 Wine Workshop & Kitchen. Þeir Agnar og Rousset skipta með sér verkum og sér Agnar alfarið um rekstur Texture á meðan Rousset stýrir nýja staðnum.

Að sögn Agnars er hugmyndafræði staðanna ólík. Nýi staðurinn sé vínbar með léttum réttum. „Það er búið að ganga vonum framar. Næsta skrefið er það að nú erum við að leita að nýju húsnæði fyrir þriðja staðinn,“ segir Agnar. 

Gordon Ramsey.