Forstjóri Iceland Express segir að vinnubrögð Flugmálastjórnar Íslands hafi því miður verið með þeim hætti að það hún hafi unnið að hagsmunagæslu fyrir Icelandair. Í gær var birt ákvörðun Samkeppniseftirlitsins sem segir að afgreiðsla Flugmálastjórnar á flugréttindum á Íslandi raski samkeppni í áætlunarflugi til og frá landinu.

Matthías Imsland segir í tilkynningu að það megi segja að starfsmenn stofnunarinnar hafi með vísvitandi hætti reynt að raska samkeppni í áætlunarflugi hérlendis.  Þá hafi þeir sent hugmyndir Iceland Express um framtíðarsýn félagsins til keppinautar okkar til umsagnar.

 Hann segir að það hafi skekkt samkeppnisstöðuna gríðarlega, hvernig Flugmálastjórn hafi staðið í hagsmunagæslu fyrir helsta keppinaut IE.  Það sé því fagnaðarefni að grípið skuli inn í með þessum hætti.  Það sé ekki eðlilegt að til þess að fá að stunda samkeppni á Íslandi þurfi að senda áformin til Icelandair til þess að þeir geti sagt Flugmálastjórn hvort þeir leggist gegn áformum IE eða ekki.

Í ákvörðun Samkeppniseftirlitsins, sem birt var í gær, segir að skilyrði nýlegrar ákvörðunar Flugmálastjórnar um leyfi til Astraeusar, sem er flugrekstraraðili Iceland Express, hefðu að óbreyttu komið í veg fyrir að félagið gæti boðið upp á áætlunarflug milli Keflavíkur og Winnipeg í Kanada næsta sumar.  

Hefur Samkeppniseftirlitið því beint bindandi fyrirmælum til Flugmálastjórnar um að breyta verklagi sínu við að veita flugréttindi með það að markmiði að auka samkeppni í flugi til og frá Íslandi.

Að sögn Samkeppniseftirlitsins batt Flugmálastjórn leyfi Iceland Express til flugs á sömu leið síðasta sumar sambærilegum skilyrðum, en samgönguráðuneytið greip þá inn í og heimilaði flugið án skilyrða.

Í tilkynningu frá Iceland Express segir að tildrög málsins séu þau að Iceland Express hyggist bjóða í sumar upp á áætlunarflug milli London og Winnipeg í Kanada með viðkomu í Keflavík. Þar sem Astraeus sé breskur flugrekandi hafi það félag leyfi til að fljúga til Kanada á grundvelli loftferðasamnings milli Kanada og ríkja Evrópusambandsins.  Sambærilegur loftferðasamningur hafi hins vegar ekki verið gerður milli Kanada og Íslands sem valdi því að Astraeus þurfi leyfi flugmálayfirvalda hér á landi til að fljúga þann hluta flugsins sem sé á milli Keflavíkur og Winnipeg.  Astraeus hafi sótt um leyfi til að fljúga umrætt áætlunarflug.  Ákvörðun Flugmálastjórnar um leyfið hafi hins vegar bundin verið því skilyrði að Iceland Express og Astraeus myndu afla sambærilegra flugréttinda fyrir íslenska flugrekendur í Kanada hjá þarlendum flugmálayfirvöldum. 

Þá segir að Flugmálastjórn hafi haldið því fram að þetta sé í samræmi við vinnureglur stofnunarinnar og hagsmuni íslenskra flugrekenda.  Iceland Express og Astraeus hafi talið að þetta skilyrði jafngildi neitun á því að fá að stunda umrætt flug.