Kragi frá Áróru Eiri Traustadóttur fatahönnuði. Myndin tengist ekki efni fréttarinnar beint. Golli / Kjartan Þorbjörnsson

Sýningin Íslensk samtímahönnun - húsgögn, vöruhönnun og arkitektúr hefur vakið athygli á Hönnunarsýningunni Stockholm Furniture Fair og Stockholm Design Week  sem stendur fram til 12. febrúar.  Sýningin, sem er á vegum Hönnunarmiðstöðvar Íslands, kynnir brot af því besta á sviði hönnunar og arkitektúrs á Íslandi, samkvæmt upplýsingum frá utanríkisráðuneytinu.

Sendiráð Íslands í viðkomandi höfuðborgum eru bakhjarlar sýningarinnar og hafa aðstoðað við uppsetningu og kynningu á hverjum stað; í  Dansk Design Center í Kaupmannahöfn vorið 2010, á heimssýningunni í  Sjanghæ í Kína í september og í Peking í nóvember og nú í Stokkhólmi. Sendiráð Íslands þar í borg efnir ásamt Hönnunarmiðstöð á morgun til kynningarmóttöku fyrir fagaðila og blaðamenn innan ramma dagskrárinnar Design Boost í Hönnunarhúsi Stokkhólms.

Sýningin hefur að geyma verk um 20 hönnuða sem valdir eru með það í huga að eiga erindi ytra til frekari kynningar, sölu eða framleiðslu, „en nú sem aldrei fyrr er brýnt að vera sýnileg á alþjóða vettvangi og styrkja erlend menningar- og viðskiptatengsl,“ segir á vef utanríkisráðuneytisins.

Stockholm Furniture Fair kaupstefna er ætluð fagfólki; framleiðendum og hönnuðum, en leikmönnum gefst einnig tækifæri til þess að skoða það sem þar er til sýnis, því opið er fyrir almenning laugardaginn 12. febrúar nk. frá kl. 09:00-17:00.

Sýningin er samstarfsverkefni Hönnunarmiðstöðvar Íslands, utanríkisráðuneytis, mennta- og menningarmálaráðuneytis, iðnaðarráðuneytis, Íslandsstofu og Hönnunarsjóðs Auroru.