„Það er að koma mjög djúp lægð í fyrramálið. Hún ætlar hins vegar að beygja svolítið fyrr af leið og í áttina að Grænlandi, og elta hinar tvær sem komu á undan,“ segir Óli Þór Árnason, veðurfræðingur hjá Veðurstofu Íslands. Þetta þýði að það verði ekki eins hvasst á landinu og verið hefur.

„Hún nær hér upp að suðurströndinni en fer líklega lítið inn á land. Við sleppum mun betur, en það verður hvasst og það fer að rigna seinni partinn,“ segir Óli Þór. Úrkoman verði þó minni en verið hefur og ekki eins hvasst.

Hann segir enn fremur að engin sérstök hlýindi séu framundan. En miðað við að það sé febrúar þá sé veðrið með ágætasta móti. 

 Afar hvasst var á landinu í nótt og í morgun en Veðurstofa Íslands var búin að spá ofsaveðri fram eftir morgni á Suður- og Vesturlandi, og rættist sú spá að sögn Óla Þórs. Víða mældist vindhraðinn á bilinu 20 til 30 metrar á sekúndu.

Hvassast varð undir Eyjafjöllum og Hafnarfjalli, en þar mældist vindhraðinn í hviðum vera um 50 metrar á sekúndu. Einnig blés hressilega á Kjalarnesi, við Ingólfsfjall og víðar á suðvesturhorninu.

Veðrið er nú smátt og smátt að ganga niður samkvæmt upplýsingum frá Veðurstofunni. Það er þó sæmilega hvasst á köflum og enn er vonskuveður á Holtavörðuheiði.

Samkvæmt upplýsingum frá Slysavarnafélaginu Landsbjörgu voru tugir björgunarsveitarmanna að störfum í nótt og í morgun vegna óveðursins. Þeir sinntu um það bil 70 aðstoðarbeiðnum. Langflest á Suðurnesjum og á höfuðborgarsvæðinu, þó aðallega í Hafnarfirði.