mbl.is/Eggert

Lögreglan á höfuðborgarsvæðinu hefur sleppt karlmanni sem var handtekinn í síðasta mánuði grunaður um nauðgun á skemmtistað í miðborg Reykjavíkur. Manninum var sleppt sl. föstudag eftir að hafa setið í gæsluvarðhaldi í tæpar fjórar vikur.

Björgvin Björgvinsson, aðstoðaryfirlögregluþjónn hjá lögreglunni á höfuðborgarsvæðinu, segir að lífssýni, sem voru send til Svíþjóðar til rannsóknar, hafi ekki verið úr manninum.

Sl. föstudag lágu rannsóknarniðurstöðurnar fyrir og var manninum, sem er erlendur ríkisborgari, þá sleppt úr haldi.

Maðurinn var fyrst úrskurðaður í gæsluvarðhald frá 10. janúar til 14. janúar á grundvelli rannsóknarhagsmuna. Svo frá 14. janúar til 11. febrúar á grundvelli almannahagsmuna.

Lögreglan segir að rannsókn málsins sé enn í fullum gangi.

Maðurinn var grunaður um að hafa hafa fylgt konu sem var ofurölvi inn á salerni Kaffibarsins og haft þar kynmök við hana án þess að hún hefði möguleika á að sporna við verknaðinum.

Fram kom í úrskurði Hæstaréttar í síðasta mánuði að upptökur af skemmtistaðnum hefðu verið skoðaðar og á upptöku hefði maðurinn og konan sést ganga inn ganginn og að konan hefði verið áberandi ölvuð, en þetta átti sér stað 8. janúar sl.

Var maðurinn handtekinn í framhaldinu, m.a. á grundvelli framburðar vitna sem sögðust hafa séð manninn ganga út af salerninu. En þar fannst konan rænulaus.

Niðurstöður lífsýnarannsóknar hafa nú leitt í ljós að maðurinn er saklaus.