Skortir samræmi í ákvörðunum
Frá neðri hluta Þjórsár. Rax / Ragnar Axelsson
Gunnar Örn Marteinsson, oddviti Skeiða- og Gnúpverjahrepps, segir hafa skort á samræmi við afgreiðslu umhverfisráðherra á skipulagi sem tengist hugsanlegum virkjunum í neðri hluta Þjórsár. Hann hefur farið fram á að ráðherra staðfesti breytingu á aðalskipulagi, en það hefur dregist í á þriðja ár.
Gunnar Örn sagði að staðfesting á breytingu á skipulagi Skeiða- og Gnúpverjahrepps væri búið að bíða afgreiðslu í á þriðja ár. Umhverfisráðuneytið hefði verið með málið til skoðunar í 14 mánuði áður en málið fór til dómstóla. Hann sagði það einkennilega stjórnsýslu að ráðuneytið gæti tekið sér svo langan tíma að afgreiða málið.
„Mér finnst þetta áfellisdómur yfir þessu fyrirkomulagi öllu. Ég hef alla tíð haft miklar efasemdir um réttmæti þessa úrskurðar ráðherrans. Ég taldi forsendurnar hæpnar eins og nú hefur komið í ljós. Það eru sex dómar búnir að dæma samhljóða í þessu máli. Nú hlýtur ráðherrann staðfesta skipulagið.“
Gunnar Örn sagði að sveitarstjórnin hefði ekki rætt um að gera kröfu til ríkisins um að bæta kostnað sem sveitarfélagið hefði haft af þessu máli. Aðalmálið væri að skipulagið yrði staðfest og sveitarfélagið þyrfti ekki að verða fyrir frekari kostnaði af málinu.
Gunnar Örn sagði að þegar umhverfisráðherra hefði staðfest breytingu á skipulagi Skeiða- og Gnúpverjahrepps og aðalskipulag Flóahrepps þá væri skipulagsvinnu vegna virkjana í neðri hluta Þjórsár lokið.
„Skipulag þessara tveggja sveitarfélaga bíður staðfestingar, en í millitíðinni hefur ráðherra staðfest breytingu á aðalskipulögum bæði Rangárþings yrta og Ásahrepps þar sem gert er ráð fyrir þessum sömu framkvæmdum. Þessi sami ráðherra var líka búinn að samþykkja vegtengingu yfir Þjórsá sem er tengd þessum virkjunarframkvæmdum. Það var unnið alveg nákvæmlega eins og undirbúningur að þessum virkjunum. Það hefur því ekki verið nokkurt samræmi í ákvörðunum frá ráðuneytinu,“ sagði Gunnar Örn.
Gunnar Örn sagðist fagna niðurstöðu Hæstaréttar sérstaklega í ljósi þess að því hefði verið haldið fram að einhver annarleg sjónarmið hefðu ráðið ákvörðun sveitarstjórnarmanna og jafnvel að þeir hefðu fengið greitt fyrir skipulagsvinnuna, sem væri fjarri lægi. „Þetta mál snerist eingöngu um að fá greiddan kostnað við framkvæmdina. Við höfum alltaf talið að orkufyrirtækin eigi ekki að losna við að borga skipulagsvinnuna frekar en aðra vinnu við undirbúning gerð virkjana.“
