Ingibjörg „Ía“ Jóhannsdóttir.

Ingibjörg fæddist í Reykjavík 31. október 1949, dóttir hjónanna Soffíu Bjarnadóttur og Jóhanns M. Kjartanssonar. Eftir gagnfræðapróf stundaði Ingibjörg nám við lýðháskóla í Noregi og eftir ársdvöl þar ytra starfaði hún hér heima hjá Landsbanka Íslands. Ingibjörg þreytti inntökupróf í Leiklistarskóla Þjóðleikhússins og útskrifaðist þaðan árið 1972. Eftir útskrift lék hún um tíma á fjölum Þjóðleikhússins, eins lék hún í nokkrum sjónvarpsleikritum.

Ingibjörg rak ásamt eiginmanni sínum veitingastaðinn Matstofu Austurbæjar um langt árabil. Árið 1991 söðluðu þau hjónin um og námu land í Tékklandi þar sem þau stofnuðu blómlegan veitingastað, Restaurant Reykjavík, í miðborg Prag og tók Ingibjörg virkan þátt í þeim rekstri. Ennfremur reistu þau sér fagurt heimili í útjaðri Prag. Þar gerðu þau einnig upp hús fyrir íslenska listamenn þar sem þeir gátu dvalið og sinnt list sinni í tiltekinn tíma endurgjaldslaust.

Ingibjörg var með eindæmum smekkvís og hafði næmt auga fyrir umhverfi sínu og báru veitingastaðurinn og heimili hennar þess glöggt merki. Sem ræðismannsfrú Íslands í Tékklandi naut Ingibjörg þess að bjóða heim bæði Íslendingum og erlendum gestum og var oft á tíðum mjög gestkvæmt á heimili hennar.

Eftirlifandi eiginmaður Ingibjargar er Þórir Gunnarsson ræðismaður og eignuðust þau tvö börn, Gunnar Egil og Soffíu Rut.