Úr fiskvinnslu Eyrarodda. Halldór Sveinbjörnsson

Verið er að leggja lokahönd á kaup á öllum eignum þrotabús Eyrarodda ehf. á Flateyri. Nýir eigendur eru Lotna ehf, en í forsvari þar eru Sigurður Aðalsteinsson útgerðarmaður og Kristján Kristjánsson skipstjóri, sem mun starfa sem framkvæmdastjóri vinnslunnar.

Að sögn Kristjáns hefur Lotna keypt allar fasteignir Eyrarodda; fasteignir, vinnsluhús, vinnslutæki og 15 tonna plastbát, Stjána Ebba. 

Hann segir að starfsemi muni hefjast innan tveggja vikna.

42 misstu vinnuna þegar Eyraroddi varð gjaldþrota. Kristján segir að ekki verði svo margir ráðnir nú, a.m.k. ekki til að byrja með. „Ætli við ráðum ekki á bilinu 20 - 30 manns. En ég á eftir að setjast yfir þetta og fjöldi starfsmanna fer auðvitað eftir því hvað okkur tekst að fá af hráefni inn í húsið.“

Lotna hefur yfir að ráða um 200 tonna kvóta í ýsu og þorski, bæði eignar- og leigukvóta, sem kemur á móti 300 tonna byggðakvóta Flateyrar. Einnig á Lotna báta, sem munu koma vestur.

„Nú erum við að byrja á að skoða málin, átta okkur á þessu og ráða mannskap. Ég vona að Flateyringar séu sáttir við þetta, öll viðbrögð sem við höfum fengið hafa verið jákvæð og góð,“ sagði Kristján.

Hann vildi ekki gefa upp kaupverðið á eignum Eyrarodda.