Steingrímur J. Sigfússon.

Steingrímur J. Sigfússon, fjármálaráðehrra, sagði á Alþingi í dag, að dómur Hæstiréttar um aðalskipulag Flóahrepps væri ekki á nokkurn hátt áfellisdómur um stjórnsýslu umhverfisráðherra.

Sagði Steingrímur, að þeir sem læsu dóminn sæju, að uppi hefði verið vafaatriði hvort það væri lögum samkvæmt að utanaðkomandi aðilar greiddu fyrir hluta af skipulagsvinnu.  Tvö ráðuneyti hefðu komist að þeirri niðurstöðu að svo væri ekki en nú hefðu dómstólar komist að annarri niðurstöðu.

Rætt var um dóminn að ósk Bjarna Benediktssonar, formanns Sjálfstæðisflokksins. Sagði Bjarni, að það væri orðið langsótt að þegar Hæstiréttur kæmist að þeirri niðurstöðu, að ráðherra hefði brotið lög væri litið á það sem gæðastimpill á vinnubrögð hans. 

Sigurður Ingi Jóhannsson, þingmaður Framsóknarflokks, spurði Steingrím hvort það væri áfram hlutverk umhverfisráðherra að vera fyrir atvinnuuppbyggingu. Sagði hann að framið hefði verið lögbrot og eðlilegast væri að umhverfisráðherra segði af sér.

Steingrímur sagði að umhverfisráðherra nyti fyllsta traust og stuðnings hans. „Ég fagna því að loks er kominn umhverfisráðherra, sem gerir það sem góður umhverfisráðherra á að gera: að standa vörð um náttúna og vilja móta áherslur sjálfbærrar þróunar og nútímalegra viðhorfa í umhverfismálum," sagði Steingrímur.