Tvö vitni sem gefið hafa skýrslu við aðalmeðferð í máli ákæruvaldsins gegn Andra Vilhelm Guðmundssyni sem ákærður er fyrir hrottafengna líkamsárás á nýársmorgun lýstu því að náðarhöggið hafi Andri Vilhelm veitt fórnarlambi sínu með háu og mjög föstu sparki. Áhöld eru hins vegar um það hvort hann hafi sparkað og kýlt manninn þar sem hann lá í jörðinni.

Vitnin sem tengjast hvorki árásarmanninum né fórnarlambinu komu bæði að þegar átökin voru hafin. Annað þeirra sá aðeins þegar Andri Vilhelm sparkaði í bringu þess og höfuð í einu sparki en við það flaug fórnarlambið, karlmaður á fertugsaldri, aftur fyrir og féll með höfuðið í jörðina. Sama vitni nefndi ekki að Andri Vilhelm hefði sparkað í manninn þar sem hann lá, en frá því greindi hann hins vegar í lögregluskýrslu sem tekin var í byrjun janúar. Sagðist vitnið telja að hann hlyti að muna hlutina betur hjá lögreglu enda stutt um liðið þá.

Einnig kom fyrir dóminn stúlka sem starfar á skemmtistað í miðborginni og ók að átökunum. Hún sagðist hafa séð manninn sparka í fórnarlambið „frekar háu sparki“ þannig að maðurinn féll niður tvær tröppur og með höfuðið í jörðinni. Þá hafi hann rifið hann upp og kýlt hann í andlitið. Þegar svo Andri Vilhelm var rifinn burtu frá fórnarlambi sínu hafi hann sparkað þrívegis í höfuð fórnarlambsins. Þá hafi allir gengið frá manninum þar sem hann lá í jörðinni, ber að ofan, meðvitundarlaus.

Stúlkan sagðist hafa hringt á lögregluna og einnig farið út úr bílnum og athuga með púls hjá manninum.