Ráðhúsið í Reykjavík. mbl.is/Júlíus

Foreldrafélag og foreldraráð Klambra krefst þess að borgaryfirvöld í Reykjavík standi við gefin loforð og hafi raunverulegt samráð við foreldra áður en teknar verði ákvarðanir sem eigi eftir að hafa alvarlegar afleiðingar fyrir börnin þeirra. Þá er gerræðislegum vinnubrögðum og sýndarmennsku mótmælt harðlega. 

Þetta kemur fram í bréfi sem var sent til borgarstjóra, menntasviðs Reykjavíkurborgar og til starfshóps til greiningar tækifæra til samrekstrar og/eða sameiningar leikskóla, grunnskóla og frístundaheimila.

Það er svohljóðandi:

„Grínið búið!

Við foreldrar leikskólabarna á Klömbrum mótmælum harðlega þeim gerræðislegu vinnubrögðum og sýndarmennsku sem Reykjavíkurborg virðist enn á ný vera að reyna að viðhafa gagnvart leikskólanum.

Nú síðast í haust var stórslysi afstýrt þegar sameina átti Klambra við Hlíðaborg. Þá gekk Oddný Sturludóttir fram fyrir skjöldu, játaði mistökin og lofaði að betri vinnubrögð myndu verða viðhöfð í framtíðinni. En enn á ný er beitt fyrirslætti og virðist vera farið af stað í hroðvirknislegan niðurskurð sem mun koma beint niður á börnunum okkar og skaða til muna starfið í leikskólanum.

Við mótmælum harðlega að:

• ... enn á eftir að sýna fjárhagslegan ávinning af aðgerðunum.
  
  
• ... sýndarmennska hafi verið viðhöfð í stað raunverulegs samráðs.
  
  
• ... afar óljóst sé hver faglegur ávinningurinn eigi að vera.
  
  
• ... forsendur sem lagðar hafa verið fram (háskólaritgerð Óskars J. Sandholt ) séu vægast sagt óljósar og beinlínis misvísandi og stangist á við rannsóknir sem gerðar hafa verið (ss doktorsritgerð prófessors Hauks Viggóssonar).

Góða fólk!

Stjórn foreldrafélagsins fer fram á að staðið verði við gefin loforð og að raunverulegt samráð verði haft við foreldra áður en teknar verða ákvarðanir sem eiga eftir að hafa alvarlegar afleiðingar fyrir börnin okkar. Með vísun í svartan húmor borgarstjóra viljum við leita allra leiða til að ekki þurfi að sníða höfuðið af til að bjarga fætinum hans.

Við teljum skorta á skynsemi, ígrunduð rök og málefnalega umræðu í öllum undirbúningi þessa máls.

Stjórnun snýst um forgangsröðun og aldrei meir en nú á erfiðum tímum. Snúum bökum saman og setjum börnin í forgang.“