Karlmaður á fertugsaldri sem varð fyrir líkamsárás í Hafnarstræti á nýársmorgun gaf skýrslu fyrir dómi í morgun en réttað er yfir árásarmanninum. Hann sagðist lítið sem ekkert muna eftir árásinni né ýmsu öðru og væri almennt í mjög slæmu ástandi. Hann hefur verið í endurhæfingu - og er enn - á Grensásdeild.

Hann sagðist aðeins muna að hann var á leið frá skemmtistaðnum NASA og á leið heim til sín. Þá hafi hann lent í þessu. Næsta sem hann man var að vakna á spítalanum. Hann sagðist aðspurður ekki þekkja árásarmanninn en viti til þess að bróðir sinn þekki hann eittvað aðeins. Þegar settur saksóknari spurði hvort hann gæti ímyndað sér hvað gerst hafði sagði maðurinn: „Ég veit bara að hann stappaði á hausnum á mér. Ég heyrði það.“

Spurður út í ástand sitt sagði maðurinn að hann hefði verið 19 daga á Landspítala í mjög slæmu ástandi, þá tóku við fjórar vikur á Grensás en hann hafi þurft að bera þangað inn. Hann sé betri í dag en ennþá allan sólarhringinn á Grensásdeild. Svo tekur við í þessari viku eða næstu vist á sjúkrahóteli. Þá fái hann mjög slæman höfuðverk á hverjum degi, sé hálf blindur hægra megin og tali vitlaust. Þá eigi hann erfitt með svefn. Óvíst sé með batahorfur.