Eggert Jóhannesson

Foreldrasamtökin Samfok fagna því að borgaryfirvöld ætli að falla frá skerðing á kennslumagni, gæslu og forfallakennslu. Þau telja þó enn of langt gengið í niðurskurði. Á fimmtudag hafa foreldrar boðað til göngu niður Skólavörðustíg að ráðhúsinu til að standa vörð um skólagöngu barna sinna.

Hefst gangan klukkan 16:30 frá Hallgrímskirkju og verður gengið niður Skólavörðustíg að ráðhúsi Reykjavíkur þar sem opinn fundur verður fyrir foreldra um niðurskurðaráform borgarinnar í leik- og grunnskólum. Munu skólaráðsfulltrúar og stjórnir foreldrafélaga reisa vörðu við aðalinngang ráðhússins. 
 
Verða þau Jón Gnarr borgarstjóri og Oddný Sturludóttir, formaður menntaráðs, með framsögu á fundinum og svara fyrirspurnum foreldra.

Ekki sammála rökum fyrir sameiningu

Stjórn Félags fagfólks í frítímaþjónustu sendi í dag frá sér yfirlýsingu um hugsanlegar sameiningar frístundaheimila og grunnskóla í Reykjavík. Segir félagið að ekki sé faglegur ávinningur af sameiningu eins og haldið hafi verið fram.

Í yfirlýsingunni segir að með því að færa frístundaheimilin yfir til skólanna væri í raun verið að segja að ekki sé pólitískur vilji fyrir því að unnið sé með börn sérstaklega á vettvangi frítímans heldur sé meiri hagur í því að samnýta starfsfólk skólanna óháð því hver fagvitund þeirra sé á starfi með börnum í frítímaþjónustu.