Borgarstjórnarfundur í Ráðhúsinu. Ernir Eyjólfsson

Borgarstjórn Reykjavíkur samþykkti í dag að vísa tillögu um að endurskoða hagræðingarkröfu menntasviðs borgarinnar til borgarráðs. Borgarfulltrúar VG og Sjálfstæðisflokksins vildu að borgarstjórn afgreiddi málið á fundi sem stendur yfir.

Meirihluti borgarstjórnar hefur tekið ákvörðun um að endurskoða áform um hagræðingu á menntasviði upp á rúmlega 200 milljónir, en hagræðingin átti að nást fram í kennslu, gæslu barna og forfallakennslu. Málið var rætt á fundi borgarstjórnar í dag.

Jón Gnarr borgarstjóri lagði til að borgarráði yrði falið að fjalla frekar um málið og koma með tillögur um næstu skref, en Sóley Tómasdóttir, borgarfulltrúi VG, lagði til að borgarstjórn, sem fer með fjárveitingarvald í borginni, tæki strax af skarið um að hætti yrði við hagræðingaráformin. Það var fellt og mun borgarráð taka málið fyrir á næsta fundi.

Jón Gnarr sagði að áform um hagræðingu á menntasviði yrðu endurskoðuð. Dagur B. Eggertsson, formaður borgarráðs, tók á fundinum undir tillögu Oddnýjar Sturludóttur, formanns menntasviðs, um að rétt væri að hækka útsvar Reykjavíkurborgar.