mbl.is/Ómar

Rúmlega 32.500 hafa skrifað nafn sitt á undirskriftarlistann kjosum.is. Þar er skorað Alþingi að hafna frumvarpi um ríkisábyrgð vegna Icesave-reikninga Landsbankans. Mikið álag hefur verið á síðunni og í rúman hálftíma var ekki hægt að skrá nýjar undirskriftir.

Samkvæmt upplýsingum frá aðstandendum síðunnar hefur álagið á síðuna verið gríðarlega mikið. Þá hafa verið gerðar árásir á síðuna og er mögulegt að þær, ásamt miklu álagi, hafi orðið þess valdandi að menn hafi ekki getað skráð sig á listann.

Axel Þór Kolbeinsson, einn aðstandenda síðunnar, segir að engar nýja undirskriftir hafi borist á milli 13:57 til 14:30. „Eftir það fór allt í samt lag,“ segir hann í samtali við mbl.is. Spurður um ástæðuna segir hann málið vera í skoðun.

„Við erum að skoða hvort það sé mögulega önnur tegund af árásum í gangi,“ segir Axel Þór. 

Fyrr í dag greindu aðstandendur síðunnar frá því að vegna ítrekaðra árása einstaklings og vina hans á síðuna hafi verið haft samband við ríkislögreglustjóra. Aðstandendur síðunnar segja að öllum tilraunum til árása verði fylgt eftir af fullum þunga.

„Við erum ekki búin að leggja fram kæru en þetta er til skoðunar. Við erum búin að ræða við ríkislögreglustjóra og fá hann til að taka málið út,“ segir Axel Þór. Stefnt sé að því að ræða við saksóknara með hvaða hætti best sé að bregðast við árásum sem þessum.