Frá Alþingi í dag. mbl.is/Ómar

Jóhanna Sigurðardóttir, forsætisráðherra, sagði í upphafi atkvæðagreiðslu á Alþingi um Icesave-frumvarpið, þeir sem hafni samningnum, sem liggur fyrir, tefli þjóðarhag í mikla tvísýnu. Tímabært sé að leiða þetta hörmulega mál til lykta.

Sagði Jóhanna að ætlað væri, að reikningurinn sem kynni að falla á Íslenska ríkið fari málið fyrir dómstóla og tapist, gæti numið 11-1200 milljörðum króna auk vaxta en á móti kæmu eignir í búi Landsbankans.

Bjarni Benediktsson, formaður Sjálfstæðisflokksins, sagði að Ísland væri fyrirmynd þjóða í því, að hafa ekki tekið skuldir bankakerfisins og gert þær að opinberum skuldum. Sagðist hann mæla með því að ágreiningunum yrði lokið með því að styðja Icesave-samninginn.

„Einkaskuldir  á ekki að gera að opinberum skuldum," sagði Margrét Tryggvadóttir, þingmaður Hreyfingarinnar.

Sigmundur Davíð Gunnlaugsson, formaður Framsóknarflokksins, sagði ummæli forsætisráðherra sýna, að stjórnvöld hefðu ekkert lært á síðustu tveimur árum. Jóhanna hefði sagt, að verði ekki fallist á Icesave-kröfurnar gæti málið farið fyrir dómstóla og tapast með skelfilegum afleiðingum.  Það tap væri samt miklu minna en það sem hefði verið augljóst af síðasta samningi. Versta hugsanlega niðurstaðan nú sé því miklu skárri en sú sem ríkisstjórnin hefði verið tilbúin til að fallast á áður og það segði allt sem segja þurfi um þetta mál, sagði Sigmundur Davíð. 

Ásmundur Einar Daðason, þingmaður Vinstri grænna, sagði að það hefði verið mikil mistök að hleypa fyrri Icesave-samningunum í gegnum þingið. Margir áhættuþættir væru enn inni í nýja samningnum og það sé fullkomlega eðlilegt að þessu máli verði lokið með þjóðaratkvæðagreiðslu. 

Birkir Jón Jónsson, þingmaður Framsóknarflokks, sagðist ekki geta stutt samningana því ekki væri sanngjarnt að 300 þúsund manna þjóð bæri ein áhættuna af málinu.

Unnur Brá Konráðsdóttir,  sagði að mikil óvissa fælist í því að segja nei og einnig í því að segja já við þessum samningi. Hún sagðist vera fylgjandi því að málið fari fyrir þjóðina vegna forsögu málsins.  

Össur Skarphéðinsson, utanríkisráðherra, sagði að Íslendingum hefði tekist að nýta gjörbreytta stöðu með því að ganga sameinaðir til nýrra samninga sem væru miklu betri en fyrri samningar.  Jafnvel ný þjóðaratkvæðagreiðsla gæti ekki breytt stöðunni til betra horfs og því liggi blákaldir hagsmunir Íslendinga í því að segja já og taka við samningnum. 

„Í samningnum felst engin þvingun," sagði Tryggvi Þór Herbertsson, þingmaður Sjálfstæðisflokksins. „Í honum felst þrá til að koma undan sænginni."

Ögmundur Jónasson, innanríkisráðherra, sagði að sér þætti þetta ekki vera gleðistund.  En ekki væri saman að jafna því sem væri á borðinu nú og í árslok 2009. Ekki væri hægt að fagna niðurstöðunni en niðurstaða væri hún og menn yrðu að horfast í augu við hana.

Nokkrir berja bumbur utan við Alþingi. mbl.is/Ómar