mbl.is/Golli

Forvarnarfulltrúi Hafnarfjarðar lét kanna í byrjun mánaðarins hvort unglingar gætu keypt sígarettur á sölustöðum tóbaks í bæjarfélaginu. Niðurstaða könnunarinnar leiddi í ljós að í tæpum 10% tilfella gátu unglingar keypt sígarettur.

Í tilkynningu frá Hafnarfjarðarbæ segir að aldrei hafi jafn fáir sölustaðir selt unglingum tóbak í Hafnarfirði frá því að núverandi tóbaksvarnarlög hafi verið sett árið 2002. Það sé erfiðara en nokkru sinni fyrr fyrir börn að kaupa sígarettur í Hafnarfirði.

Fram kemur að tveir unglingar úr 10. bekk hafi farið á sölustaði undir eftirliti starfsmanna Hafnarfjarðarbæjar og reyndu þeir að kaupa sígarettur. Þá segir að tveir staðir af 21 hafi selt unglingunum tóbak. Tekið er fram að ekki hafi verið farið inn á staði sem séu með vínveitingaleyfi og selji tóbak.

Aukið aðhald með fleiri könnunum

Þá segir að frekari upplýsingar úr könnuninni verði sendar Heilbrigðiseftirliti Kópavogs- og Hafnarfjarðarsvæðisins þar sem unnið verði úr þeim eins og lög geri ráð fyrir.

Forvarnarfulltrúi mun jafnframt senda sölustöðunum sem seldu börnunum tóbak ábending. Búast megi við því að þeir staðir sem seldu börnum tóbak fái áminningu eins og kveði á um í lögum um tóbaksvarnir.
 
„Síðustu misseri hafa söluaðilar sett sér stöðugt skýrari reglur sem tryggja að aldurstakmörk séu virt. Hafnarfjarðarbær hefur aukið tíðni kannana og veitt sölustöðum stöðugt aðhald. Meirihluti sölustaða í Hafnarfirði hefur gert sérstakt samkomulag við forvarnafulltrúann sem miðar að því að leita allra leiða til að koma í veg fyrir sölu tóbaks til barna,“ segir í tilkynningunni.