Goðafoss, gámaskip Eimskips, strandaði í kvöld við Hvaleyjar í Østfold suður af Ósló í Noregi.  Benedikt Elísson, forstöðumaður trygginga- og tjónamála hjá Eimskip, segir að sléttur sjór sé og engin hætta á ferðum. Engin slys hafi orðið á fólki en lítill olíuleki hafi komið að skipinu.

„Við erum bara róleg, það er ekkert neyðarástand. Skipið lenti á rifi og situr þar. Það er sléttur sjór og engin hætta á ferðum. Engin slys á fólki en smávægilegur olíuleki. Við erum bara að vinna að því með áhöfninni að leysa málið ,“ segir Benedikt.

Hann segir Goðafoss hafi verið á leið til Helsingjaborgar í Svíþjóð frá Fredrikstad í Noregi þegar óhappið varð. Ekki sé gert ráð fyrir að stórtjón hafi orðið miðað við þær upplýsingar sem nú liggja fyrir.

Fjórtán manns eru um borð í Goðafossi en enginn hefur verið fluttur frá borði. Hafnsögumaður var nýfarinn frá borði þegar skipið strandaði. 

Á fréttavef Dagbladet í Noregi er haft eftir sjónarvotti, Ragnar Bjørck, sem býr skammt frá strandstaðnum, að hann hafi heyrt hávaða þegar skipið tók niðri.  Hann segist ekki sjá neina olíubrák á sjónum en leki olía úr skipinu kunni það að hafa alvarlegar afleiðingar fyrir lífríkið í Óslófirði.

Norska strandgæslan segir á vef sínum, að líklega séu um 800 tonn af olíu um borð í skipinu. Olía leki úr tveimur tönkum um mitt skipið, sem séu með um 250 tonn af olíu hvor.  

Fjögur skip frá strandgæslunni, þar af einn dráttarbátur, eru á leið að Goðafossi en skipin verða ekki við strandstaðinn fyrr en í fyrramálið. 

Hvaleyjar, eða Hvaler, var sögusvið samnefndra sjónvarpsþátta sem sýndir voru nýlega í Sjónvarpinu.

Goðafoss er 165 metra langt skip og burðargeta þess er 17.000 tonn. Skipið var byggt árið 1995.  439 gámar eru um borð en ekki er vitað um innihaldið.