Kort af siglingasvæðinu þar sem Goðafoss strandaði.

Olíugildrur voru lagðar í nótt umhverfis gámaskipið Goðafoss á strandstað við Hvaleyjar í Óslóarfirði. Pål Bustgaard skipstjóri á norska björgunarskipinu Horn Flyer segir olíuleka frá Goðafossi miklu meiri en í fyrstu var talið og við vefsetrið F-b.no segir hann, að um hamfarir sé að ræða 

Önnur gildran var lögð rétt við skipið og önnur utar til að stöðva þann leka sem slyppi út fyrir innri gildruna. Norska strandgæslan hefur tekið stjórn mála á strandstað Goðafoss í Óslóarfirði í sínar hendur. Hún hefur í nótt notið aðstoðar flugvéla og skipa sænsku strandgæslunnar.

Fjölda norskra björgunarskipa hefur verið stefnt á vettvang við Hvaleyjar og öll áhersla strandgæslunnar verið á að girða Goðafoss af til að hindra útbreiðslu olíumengunarinnar en strandstaðurinn er í náttúruparadís.

Olíutaumur 2,4 sjómílur á haf út

Ane Eide Kjærås hjá strandgæslunni segir við fréttavef Aftenposten að olía leki úr tönkum miðskips í Goðafossi. Þeir rúmium 500 tonn en óljóst sé hversu mikil olía hafi verið í þeim. Fréttavefurinn segir að í heildina sé talið að um 800 tonn af olíu hafi verið í Goðafossi þegar hann tók niðri á skerinu eftir að hafa borið af leið.

Olíurák hefur teygt sig hálfa þriðju sjómílu vestsuðvestur frá Goðafossi, að því er fram kemur á vef strandgæslunnar. Vegna hagstæðra vindátta á strandstaðnum stefnir olía sem stendur á haf út en ekki til lands.

Veður hefur verið tiltölulega gott á strandstað en Goðafoss liggur með 7° slagsíðu á skerinu við Hvaleyjar. Skipið var á siglingu frá Frederiksstad er það tók niðri.