Háskólinn í Reykjavík er með opið hús í dag. mbl.is/Golli

 Háskólinn í Reykjavík er einn þeirra háskóla sem tekur þátt í Háskóladeginum í dag. Opið hús verður í húsakynnum skólans í Nauthólsvík milli kl. 11 og 16 og munu nemendur og starfsmenn taka á móti gestum og veita ráðgjöf um allt grunn- og framhaldsnám við skólann.

Rannsóknarstofur skólans verða opnar og gestum gefst tækifæri á að kynna sér rannsóknir sem fram fara við skólann, prófa tól og tæki og njóta fjölbreyttrar dagskrár nemenda, fræði- og vísindamanna og annarra starfsmanna HR.

Gestir fá m.a. tækifæri til að kanna fjármálalæsi sitt, laganemar kynna lögfræðiráðgjöf sem þeir bjóða endurgjaldslaust í viku hverri, mannlegar sýndarverur sýna hæfni sína til samskipta, vélmenni leika lausum hala, eðlisfræðingar leika listir sínar, keppt verður í súlubroti, rafbíll verður til sýnis og keppt verður til úrslita í hinni árlegu HR-áskorun. Gestum gefst kostur á að reyna sig við forritunarþrautir, taka þátt í sálfræðiprófunum, kynnast virkni myndaskoðara og sambandi tölvu og tungumáls.Þá verða náms- og starfsráðgjafar á staðnum og Stúdentafélag HR kynnir starfsemi sína og býður gestum upp á pítsur og gos.

HR-áskorunin hefur verið fastur liður undanfarin ár en í ár er keppt í hönnun og smíði á gosþjóni. Gosþjónninn á að nota a.m.k. 20 aðgerðir til þess að hella úr appelsínflösku (25 cl.) í glas á tilsettum tíma. Vélin á að vera í anda teiknimyndahöfundarins Rube Goldberg. Úrslitakeppnin hefst kl. 14:30.Nánari upplýsingar um dagskrána er að finna hér.