Sunna Viðarsdóttir, verkfræðingur í  Christchurch á Nýja-Sjálandi, segir að afleiðingar jarðskjálftans í borginni séu hrikalegar. Hún óttast að fleiri eigi eftir að finnast látnir. Stöðugir eftirskjálftar hafi fylgt í kjölfar stóra skjálftans.

„Upplifun mín af skjálftanum gefur kannski ekki rétta mynd af því sem gerðist. Ég var í vinnunni og mér fannst þetta vera eins og stór eftirskjálfti frekar en einhver risaskjálfti. Það hristist allt í talsvert langan tíma maður hugsaði hvort þetta ætlaði ekki að fara að hætta. Ég varð hins vegar hálfhissa þegar allir voru sendir heim úr vinnunni. Ég fékk aftur á móti sjokk þegar ég fréttir af afleiðingum skjálftans,“ sagði Sunna.

Sunna starfar sem verkfræðingur í Christchurch og hún var ásamt samstarfsmönnum sínum að steypa þegar skjálftinn reið yfir. Hún sagði að engin óhöpp hefðu orðið á vinnustaðnum, en fólk hefði eðlilega orðið hrætt, m.a. við þunga hluti sem héngu í krana. Fólk hefði forðað sér.

Sunna sagði að það væru ekki miklar skemmdir þar sem hún byggi, en ástandið væri mjög slæmt í miðborginni og í austurhluta borgarinnar. „Það er allt rafmagnslaust og vatnslaust. Miðborgin er lokuð af, en fréttir hafa borist af því að þar sé fólk lokað inn í húsum sem hrundu. Útvarpið hefur í dag verið að tala við fólk sem horfði á byggingar hrynja og sá fólk lokast inni. Þetta eru hrikalegar frásagnir.“

Sunna sagði hermenn væru mættir á staðinn til að aðstoða við björgun. „Í austurbænum hafa myndast uppsprettur. Vatn flæðir það upp úr jörðinni og ég talaði við konu sem ók eftir götu þar sem vatn flæddi hátt upp á bíl hennar. Það hafa líka myndast stórar holur í götum og dæmi um að bílar hafi ekið ofan í þær þannig að afturhjólin standi upp úr.“

Upptök jarðskjálftans eru nálægt hafnarbænum Littleton Harbour. „Mér skilst að þar sé allt í rúst. Bærinn er lokaður af vegna þess að það þarf að fara í gegnum göng til að komast til hans og þau eru lokuð. Ég veit ekki hvort það er vegna skemmda á göngunum eða vegna ótta um öryggi þeirra.“

Sunna sagði að margt fólk í Christchurch hefði verið á tánum eftir skjálftann í september. Eftirskjálftarnir hefðu hins vegar verið farnir að minnka og lengra verið á milli þeirra. „Jarðskjálftar voru svona að hverfa úr huga manns, en svo kemur þetta og ég held að þetta sé rosalegt sjokk fyrir marga.“

Sunna sagðist óttast að fleiri eigi eftir að finnast látnir. Fyrstu tölur voru um að 17 hefðu látist. Síðan hefi verið talað um 65. Hún sagði að aðstæður til að hlúa að slösuðum væru erfiðar því að ákveðið hefði verið að tæma spítalann þar sem byggingin væri ekki talin örugg. Einnig hefði þurft að tæma lögreglustöðina.

Sunna Viðarsdóttir verkfræðingur í Christchurch.