Frekari úttekt á öryggismálum tölvukerfis Alþingis stendur yfir, en að auki voru varnir auknar þegar ómerkt tölva fannst í húsakynnum Alþingis í fyrra. Þetta kemur fram í svari forseta Alþingis við fyrirspurn þingmanns Framsóknarflokks.

Vigdís Hauksdóttir, þingmaður Framsóknarflokks, spurði m.a. hvort forsætisnefnd hafi komið saman til ákvarðanatöku þegar ómerkta tölvan fannst og ef svo hvaða ákvarðanir hafi verið teknar. Svar Ástu Ragnheiðar Jóhannesdóttur, forseta Alþingis, er afdráttarlaust: Nei.

Einnig spurði Vigdís út það hvers vegna ríkislögreglustjóri og starfsfólk hans var ekki kallað út þegar tölvan fannst. Ásta Ragnheiður bendir á að haft hafi verið samband við lögreglu höfuðborgarsvæðisins sem annist gæslu Alþingishússins og sé í nær daglegu sambandi við þingverði. „Mat um það hvort tilkynna ætti ríkislögreglustjóra um tölvufundinn lá hjá lögreglunni á höfuðborgarsvæðinu,“ segir í svarinu.

Þá segir Ásta Ragnheiður að engar spurningar hafi vaknað þegar í ljós kom að tölvan var tengd inn á netið 28. desember 2009, sama dag og umræður um Icesave hófust á ný. Né hefur Ásta vakið máls á því við ríkislögreglustjóra að um árás á æðstu stjórn ríkisins hafi verið að ræða. Hins vegar héldu forsætisnefnd og fulltrúar þingflokka fund um málið með yfirmönnum lögreglunnar á höfuðborgarsvæðinu.