Hollenska dagblaðið De Telegraaf sló frétt af ákvörðun forseta Íslands um synjun Icesave-laganna upp á forsíðu sl. mánudag.

„Auðvitað hafa ýmsir aðilar verið að sinna því, að upplýsa um stöðuna. Það hefur verið rætt við matsfyrirtækin og það hafa ýmsir talað saman,“ segir Steingrímur J. Sigfússon fjármálaráðherra um upplýsingamiðlun stjórnvalda erlendis vegna synjunar forsetans á nýju Icesave-lögunum. 

„Ef spurt er um viðbrögðin [við synjuninni] almennt er þau eins og við mátti búast. Það hefur heilmikið verið um þetta fjallað og það er ekki hægt að horfa fram hjá því að þetta setur ákveðna óvissu og ákveðið spurningamerki aftur við okkar stöðu.

Erlendir fjölmiðlar fjalla um umfjöllun matsfyrirtækjanna, svo dæmi sé tekið. Það hefur ákveðin áhrif á umræðuna. Annars má segja að þetta sé þokkalega rólegt. Ég tel ekki að það orðið neitt fár út af þessu. Að því leyti til held ég að við getum verið sáttir þar. Nú viðbrögð í Hollandi og Bretlandi hafa verið mjög yfirveguð, þ.e.a.s. viðbrögð stjórnvalda.

Ef þau hafa verið einhver hafa þau verið mjög yfirveguð. Það sama gildir ekki endilega um einstaka þingmenn í Hollandi, svo dæmi sé tekið. Ég held að í sjálfu sér bíði menn bara eftir því að við klárum þessa kosningu.“

- Veistu hvenær kynning á sjónarmiðum íslenskra stjórnvalda í málinu á erlendri grundu fer af stað?

„Auðvitað hafa ýmsir aðilar verið að sinna því, að upplýsa um stöðuna. Það hafa bæði utanríkisþjónustan og ráðuneyti og seðlabankinn og fleiri gert í samskiptum við sína aðila. Það hefur verið rætt við matsfyrirtækin og það hafa ýmsir talað saman. Það er fyrst og fremst verið að upplýsa um stöðuna og hvað gerist næst.“

- Hefur verið leitað til þín?

„Já. Ég hef farið í viðtöl hjá nokkrum fjölmiðlum. Ég hef ekkert sérstaklega verið að gefa færi á mér en þó farið í nokkur viðtöl,“ segir Steingrímur.