Færunestindar í Skaftafellsfjöllum eru innan Vatnajökulsþjóðgarðs. mbl.is/RAX

Stjórn Skotveiðifélags Íslands (Skotvís) segist harma að fyrirheit um samráð hafi um stjórnunar- og verndaráætlun fyrir Vatnajökulsþjóðgarð hafi verið svikin og spyr hvort þetta sé forsmekkurinn að því sem koma skal þegar fjalla á um mál sem snúa að náttúruvernd.

Svandís Svavarsdóttir, umhverfisráðherra, gerði fyrr í dag grein fyrir ákvörðun sinni um að samþykkja tillögu að stjórnunar- og verndaráætlun fyrir Vatnajökulsþjóðgarðs án breytinga. 

Stjórn Skotvís bendir á að áætlunin er gjörningur sem sé gerður án aðkomu landssamtaka skotveiðimanna. Samtökunum hafi ekki á neinu stigi málsins verið boðin aðkoma að undirbúningsferlinu eins og skýrt sé kveðið á í lögum um þjóðgarðinn. Þá farið á svig við stjórnsýslulög, t.d. með takmörkunum sem ganga gegn meðalhófsreglu.

Segist stjórn Skotvís ítrekað hafa bent á annmarka í ferlinu og forsendur veiðitakmarkanna og gefið kost á því að ræða tillögurnar efnislega.  Hvorki stjórn þjóðgarðsins né ráðherra hafi sýnt því áhuga. 

„Þrátt fyrir niðurstöðu ráðherra, þá lítur stjórn Skotvís svo á að umhverfisráðherra hafi með yfirlýsingu sinni viðurkennt misbrestina í ferlinu með því að bæta fyrir mistökin og taka upp samráð varðandi samgöngur innan þjóðgarðsins, en slíkt samráð stendur skotveiðimönnum ekki til boða.  Eðlilegt er að málefni skotveiðimanna, s.s. er snúa að veiðistjórnun séu sett í sama farveg, því annars mun ekki ríkja almenn sátt um Vatnajökulsþjóðgarð," segir í ályktuninni.