Íslensk stjórnvöld taka undir harðorða ályktun öryggisráðs Sameinuðu þjóðanna, sem samþykkt var um helgina þar sem valdbeiting og mannréttindabrot stjórnvalda í Líbíu eru fordæmd, vopnasölubann sett á landið, svo og ákvæði um ferðabann og frystingu eigna Múammars Gaddafis, einræðisherra Líbíu í 42 ár.

Sakamáladómstól Sameinuðu þjóðanna í Haag var ennfremur falið að rannsaka árásir öryggissveita Gaddafis á íbúa landsins og ákvarða hvort þeir sem bera ábyrgð á morðum öryggissveitanna og öðrum mannréttindabrotum verði sóttir til saka.

Fram kemur í tilkynningu frá utanríkisráðuneytinu, að Össur Skarphéðinsson, utanríkisráðherra, hafi í síðustu viku fordæmt  framferði líbískra stjórnvalda gagnvart óbreyttum borgurum. Íslensk stjórnvöld hafi fylgt þessari fordæmingu eftir, m.a. með stuðningi við ályktun öryggisráðsins. Í utanríkisráðuneytinu sé nú þegar hafin vinna að innleiðingu ályktunar öryggisráðsins hér á landi.

Ísland var einnig eitt þeirra ríkja sem fór fram á sérstakan fund í mannréttindaráði Sameinuðu þjóðanna í Genf um ástandið í Líbíu og sem stóð að ályktun í mannréttindaráðinu sl. föstudag þar sem mannréttindabrot líbískra stjórnvalda eru fordæmd harðlega. Í ályktuninni eru brotin sögð vera á mörkum þess að vera glæpir gegn mannkyni og þrýst á líbísk stjórnvöld að stöðva þegar í stað frekari mannréttindabrot.  Þau eru einnig hvött  til að tryggja ferðafrelsi almennra borgara, þ.m.t. ríkisborgara annarra ríkja, opna fyrir internet- og símaaðgang, hætta hótunum, ofsóknum og handtökum á almennum borgurum án dóms og laga. 

Íslensk stjórnvöld hafa ennfremur tekið undir ákall Evrópusambandsins sl. fimmtudag um að þegar verði bundinn endi á ofbeldi gegn óbreyttum borgurum.