Golli / Kjartan Þorbjörnsson

Íslandsbanki hefur á síðustu vikum unnið að endurútreikningi húsnæðis- og bílalána, kaupleigusamninga og einkaleigusamninga einstaklinga í erlendum myntum. Um er að ræða nærri 12 þúsund bílalán og 5 þúsund húsnæðislán.

Bankinn stefnir að því að því að ljúka í þessari viku við endurútreikning á nær tíu þúsund bílalánum af þeim tæplega tólf þúsund lánum sem verða endurreiknuð.

Gert er ráð fyrir að síðasti áfangi endurútreiknings bílalána, samtals um 2000 lán, verði birtur viðskiptavinum á næstum fjórum vikum. Íslandsbanki hefur greitt út um einn og hálfan milljarð króna til viðskiptavina vegna endurútreiknings.  

Í tilkynningu frá Íslandsbanka segir, að bankinn hafi samhliða þessu hafið endurútreikning á húsnæðislánum og gert ítarlega úttekt á þeim lánasamningum sem hafi verið algengastir undanfarin ár. Bankinn hafi ákveðið að ganga lengra en breytingar á lögum, sem samþykktar voru af Alþingi í desember segja til um.

Það þýði að öll erlend lán með veði í íbúðarhúsnæði verði endurreiknuð hjá Íslandsbanka, burt séð frá því hvort um íbúðarhúsnæði til eigin nota er að ræða eða ekki.

Þá bjóði Íslandsbanki einnig upp á höfuðstólslækkun og fleiri valkosti um vaxtakjör en lögin gera ráð fyrir, m.a. tímabundinn vaxtaafslátt frá óverðtryggðum húsnæðislánakjörum. Breytilegir óverðtryggðir vextir Íslandsbanka með tímabundnum afsláttarkjörum eru nú 3,75%. 

5000 húsnæðislán endurreiknuð

Í heild verða um 5000 húsnæðislán endurreiknuð og hafa um eitt þúsund lán verið birt í heimabönkum viðskiptavina bankans. Stefnt er að því að endurútreikningur allra lánam sem teljast til húsnæðislána samkvæmt lögunum, verði birtur í heimabönkum viðskiptavina fyrir lok mánaðarins.

Þar til endurútreikningar liggja fyrir stendur viðskiptavinum með húsnæðislán áfram til boða að greiða mánaðarlega 5000 krónur af hverri upphaflegri milljón lánsins. Allar greiðslur verða teknar með inn í endurútreikning lánsins.