Huginn VE með um 800 tonn af loðnu á síðunni á miðjum Faxaflóa í síðustu viku. mbl.is/Óskar

„Það eru engar aðstæður þessa dagana til að stunda nótaveiðar, bræla og haugasjór,“ sagði Sturla Einarsson, skipstjóri á nótaskipinu Guðmundi VE, í samtali eftir hádegi í gær.

Þeir voru þá staddir rétt sunnan við Malarrif á Snæfellsnesi, en skipin hafa undanfarið fengið góðan loðnuafla á norðanverðum Faxaflóa og við Snæfellsnes.

„Við erum búnir að kasta tvisvar og fá um 800 tonn og sluppum eiginlega með skrekkinn, en margir lentu í áföllum, rifu eða slitu, og höfðu lítið upp úr krafsinu nema tjón á nótinni. Þessa stundina eru 15-20 metrar af suðvestri með mikilli ölduhæð og það er ótíð í kortunum fram undir helgi. Loðnan er alveg komin að hrygningu þannig að maður veit ekki hvort botninn dettur úr þessu,“ sagði Sturla. Hann sagði hugsanlegt að dúraði á milli í dag og þá yrði kannski hægt að kasta.