Isavia segir að allt stefni í að ferðasumarið 2011 verði hið umfangsmesta á Keflavíkurflugvelli frá upphafi. Íslenskir flugrekendur hafi bætt við flugflota sinn og hafi aldrei haft jafnmargar flugvélar í áætlunarflugi til og frá landinu.

Fram kemur í tilkynningu að margir nýir áfangastaðir verði í boði í sumar auk þess sem tíðni ferða til margra borga verði aukin miðað við undanfarin ár. Einnig muni 13 erlend flugfélög halda uppi ferðum til Íslands í sumar og hafi þau aldrei verið fleiri.

„Ljóst er að sú mikla umfjöllun sem Ísland fékk í kjölfar gossins í Eyjafjallajökli vorið 2010 hefur komið Íslandi á alheimsferðakortið með rækilegum hætti,“ segir í tilkynningu frá Isavia.

Aukið álag

Þá segir að álagið á starfsemi Keflavíkurflugvallar muni aukast gríðarlega af þessum sökum. Síðastliðið sumar hafi 14 – 15 farþegaflug verið afgreidd samtímis á háannatíma að morgni og síðdegis flesta daga vikunnar. Samkvæmt áætlun á komandi sumri verði þau að jafnaði 18 – 20. Búast megi við að meðalaukning farþega á álagstíma í Flugstöð Leifs Eiríkssonar geti orðið á bilinu 500 – 700 manns miðað við síðastliðið sumar. 

Til þess að anna þessari miklu aukningu verði ráðist í nokkrar endurbætur á flugstöðinni til þæginda fyrir farþega. Afköst í vopnaleit verði aukin, vopnaleitarsalurinn stækkaður og sjálfsinnritunarstöðvum verði fjölgað í brottfararsal.

Brottfarartímum mögulega breytt

„Flugvallaryfirvöld, flugfélög og flugafgreiðsluaðilar vinna ötullega að samræmdum lausnum til aukins hagræðis við afgreiðslu og þæginda fyrir viðskiptavini sinna, þ.m.t viðræður um hvort að flugfélögin breyti brottfarartímum í einhverjum tilfellum.

Farþegar eru hvattir til þess að mæta mjög tímanlega fyrir flug næsta sumar svo forðast megi óþarfa tafir og streitu og valda jafnvel seinkun á eigin flugi eða missa af fluginu,“ segir í tilkynningu.