Hreindýr eru m.a. á ferðinni þar sem vegir eru litaðir rauðir. Vegagerðin

Vegagerðin bendir á að víða sé krapasnjór á þjóðvegum á Suðurlandi, þ.e. utan hringvegar og einkum í uppsveitum.  Vegfarendur á Austurlandi eru varaðir við mikilli umferð hreindýra.

Á Vesturlandi er krapi, hálka eða hálkublettir á flestum vegum og sumstaðar snjókoma eða él. Þæfingsfærð er á Holtavörðuheiði og mikil ofankoma.

Á Vestfjörðum er hálka á fjallvegum en víðast hálkublettir á láglendi.

Hálka, hálkublettir eða snjóþekja er víða á Norðurlandi og éljagangur eða snjókoma.

Á Austurlandi og Suðausturlandi eru vegir greiðfærir.

Skörp veðraskil yfir landinu

Á vef Vegagerðarinnar eru eftirfarandi ábendingar frá veðurfræðingi: „Mjög skörp veðraskil liggja nú norðaustur um landið. Vestan þeirra, s.s. á höfuðborgarsvæðinu er hægur vindur og dálítil snjókoma fram á kvöld. Eins í Borgarfirði og norður í land, en úrkomulaust að mestu fyrir vestan. Fyrir austan fjall er mun hlýrra, leysing með rigningu og hvassri SV-átt alveg austur á firði og þar nær að hlána upp á hæstu fjallvegi síðar í kvöld. Lægð fer hratt norðaustur yfir landið austanvert og í kjölfar hennar hvessir um stund í nótt og fyrramálið af norðvestri og kólnar um land allt. Norðaustanlands er þannig spáð hríðarbyl um tíma seint í nótt og fram á morgundaginn.“

Þá vara Vegagerðin og Náttúrustofa Austurlands vegfarendur á Austurlandi við mikilli umferð hreindýra og er útbreiðsla þeirra sýnd á meðfylgjandi korti.

Vegfarendur eru einnig beðnir um að hafa í huga að víða er ekki mokað eða saltað á kvöldin og nóttunni. Raunar sinni Vegagerðin ekki sumum vegum nema fáa daga í viku. Um þetta má fá upplýsingar á vef Vegagerðarinnar.