Íbúðirnar eru í New York. GARY HERSHORN

Jón Ásgeir Jóhannesson og Ingibjörg Pálmadóttir áttu um tíma tvær lúxusíbúðir í New York, en aðra hefur gamli Landsbankinn leyst til sín en hin íbúðin er ein þeirra eigna sem slitastjórn Glitnis hefur fryst.

Gamli Landsbankinn hefur leyst til sín íbúð sem Jón Ásgeir átti í Gramercy Park North í New York og er bankinn að undirbúa sölu á henni. Jón Ásgeir átti aðra íbúð á sama stað og hún er enn í eigu hans. Glitnir fékk með dómsúrskurði frystingu á þessa og fleiri eignir Jóns Ásgeirs erlendis og hér á landi.

Dýrar eignir eins og t.d. þessar íbúðir í New York eru gjarnan veðsettar með lánum frá fleiri en einni lánastofnun. Við skuldauppgjör eins og bankarnir vinna nú að reyna bankanir því gjarnan að semja um flutning á veðum til að greiða fyrir því að hægt sé að setja eignir í sölu. Þannig mun hafa verið staðið að málum varðandi íbúðina sem Gamli Landsbankinn hefur nú yfirtekið.

Ingibjörg Pálmadóttir sagði í yfirlýsingu í gær, að íbúðin í New York, sem skilanefnd Landsbankans leysti til sín, sé hluti af skuldauppgjöri hennar við Landsbankann. Hún sagði einnig, að Landsbanki Íslands hafi ekki verið með veð í nefndri íbúð.