Foreldrar hafna hugmyndum um sameiningu
Grafarvogur mbl.is/Brynjar Gauti
Á fjölmennum fundi foreldrafélags Víkurskóla í kvöld var samþykkt ályktun þar sem mælt var með sameiningu menntasviðs og leikskólasviðs en sameiningum sem snerta Víkurskóla hafnað.
Á síðasta ári voru kynntar hugmyndir um svonefndan safnskóla sem foreldrar barna í Víkurskóla höfnuðu eindregið. Á þeim tíma var því ítrekað haldið fram að engar ákvarðanir yrðu teknar í óþökk íbúa hverfisins. Fundurinn hafnar öllum órökstuddum hugmyndum um niðurskurð, sameiningu og samrekstur og krefst þess að trúnaðargögn sem send hafa verið skólastjórnendum verði umsvifalaust birt í samræmi við kröfur um gegnsæi.
Fundarmenn krefjast þess að haldinn verði hið fyrsta fundur með Oddnýju Sturludóttur, formanni menntaráðs, sem og fulltrúum allra flokka í borgarstjórn, þar sem farið verður fram á skýr svör varðandi fyrirhuguð áform um breytingar á skólastarfi Víkurskóla.
Fundur foreldra nemendaí Víkurskóla styður heilshugar ályktun skólaráðs og foreldrafélags Víkurskóla sem samþykkt var 16. febrúar sl. og send borgarstjóra, aðstoðarmanni borgarstjóra, kjörnum borgarfulltrúum og fræðslustjóra. Þar segir:
Búið er að skera niður til rekstrar grunnskóla síðustu tvö ár um 13 % og ekki verður gengið lengra í þeim efnum nema það komi niður á lögbundinni kennslu, stærð námshópa og gæðum skólastarfs ólíkt því sem haldið hefur verið fram af fulltrúum borgaryfirvalda. Því er það krafa skólaráðs Víkurskóla að boðaður niðurskurður verði dreginn til baka, ekki aðeins að hluta eins og nú hefur verið gert heldur að fullu.
---
Skólaráð leggur til að menntasvið og leikskólasvið verði sameinað og skorið verði niður í yfirstjórn þessara sviða áður en farið er að huga að sameiningu skóla og samrekstri grunn- og leikskóla.
Skólaráð furðar sig á framkomnum hugmyndum um sameiningu skóla í Grafarvogi og þeim vinnubrögðum sem nefndin hefur viðhaft á svokölluðum samráðs- og rýnihópafundum. Hugmyndirnar eru hvorki studdar faglegum né fjárhagslegum rökum. Á samráðsfundunum var vitnað í rannsóknir sem ekki voru tilgreindar og tölulegar upplýsingar um líðan og námsárangur barna túlkaðar mjög einhliða. Ámælisvert er að þátttakendur fengu ekki aðgang að samantekt fundanna.
Skólaráð Víkurskóla hafnar með öllu framkomnum sameiningarhugmyndum sem varða Víkurskóla.“
