Þingmennirnir Helgi Hjörvar, t.h., og Tryggvi Þór Herbertsson.

Helgi Hjörvar, þingmaður Samfylkingarinnar, lýsti sig andvígan þingsályktunartillögu um stjórnlagaráð, sem nú er til meðferðar á Alþingi.

Sagði Helgi, að með tillögu um stjórnlagaráð freistaði einfaldur meirihluti á Alþingi þess að  löggilda óbeinlínis það sem dómarar Hæstaréttar hefðu ógilt. „Það er vont fordæmi vegna þess að við höfum sett dómara Hæstaréttar til að gæta að mannréttindum, lögum og reglu og það væri ófært ef Alþingi legði það í vana sinn að löggilda jafnharðan það sem dómararnir ógilda," sagði Helgi.

Hann sagðist vera þeirrar skoðunar að endurtaka eigi kosninguna til stjórnlagaþings.  Helgi sagðist einnig vera í hópi þeirra, sem væru ósammála þeirri ákvörðun Hæstaréttar að ógilda kosninguna. En ekki væri hægt að haga sér þannig, að það færi eftir því hvort mönnum líki niðurstaða Hæstaréttar hvernig menn bregðast við.