Fjör á leikskólaskólinni. Ómar Óskarsson

„Ég tel að það hefði átt að vera löngu búið að reikna út sparnaðinn við hverja tillögu áður en hún fer út í umræðuna. Það hefur ekki verið gert,“ segir Kjartan Magnússon, borgarfulltrúi Sjálfstæðisflokksins, sem gagnrýnir harðlega vinnubrögð við hagræðingu í skólakerfinu.

Fram kom í fréttum Ríkisútvarpsins í dag, að áætlaður sparnaður Reykjavíkurborgar við sameiningu grunn- og leikskóla og betri nýtingu húsnæðis þeirra sé innan við 1% af heildarrekstrarkostnaðir þeirra. Mestur sé sparnaður vegna breyttrar nýtingar á húsnæði skólanna.

Aðeins fimmtán milljónir sparist á þessu ári en á næsta ári sparist um 300 milljónir, mest vegna breytrar nýtingar á húsnæði skólanna. Sameiningarnar sjálfar spara um 150 milljónir og felast þær aðallega minni launakostnaði vegna stjórnunar. Sparnaðurinn eykst síðan milli ára og 2014 eiga breytingarnar að spara borginni rúmar 400 milljónir króna.

Tölurnar á reiki

Kjartan segir mikla óvissu hafa ríkt um hversu mikil sparnaðurinn eigi að verða.

„Tölur um áætlaðan sparnað hafa verið á miklu reiki og hafa breyst frá degi til dags. Það gerir alla umræðuna mjög erfiða að maður veit ekki hvaða tölur maður getur unnið með. Þess vegna hefði verið betra að ræða tölurnar betur og hafa þær á hreinu áður en maður fer að ræða einstaka liði í aðgerðunum. Okkur og allt lærdómsumhverfið í Reykjavík, sem á að taka þátt í þessari umræðu skortir enn þá lykilgögn eins og tölur um hversu mikið eigi að spara,“ sagði Kjartan.

Erfitt að fá upplýsingar

Kjartan segir upplýsingagjöf meirihlutans hafa verið ábótavant.

„Annað dæmi er að í þessari vinnu hef ég ítrekað óskað eftir því hver fjarlægðin er á milli þeirra skóla sem á að sameina. Þær upplýsingar fékk ég ekki fyrr en í gær en þær hefðu auðvitað átt að liggja fyrir löngu fyrr. Ekki stendur hins vegar á því hjá meirihlutanum að mæla fjarlægð í metrum að hverri einustu sorptunnu í Reykjavík."

„Forkastanleg vinnubrögð“ 

Kjartan telur meirihlutann hafa staðið illa að hagræðingunni.

„Þetta eru forkastanleg og óvönduð vinnubrögð. Oddný Sturludóttir [formaður menntaráðs] hefur leitt þennan hóp og haft allan veturinn til þess. Þegar séð varð hvert stefndi eftir áramót, óskuðum við sjálfstæðismenn eftir því að vinnubrögð yrðu bætt og fulltrúum foreldra, skólastjóra kennara og annarra starfsmanna boðin raunveruleg aðkoma að vinnunni með setu í umræddum starfshópi. Meirihlutinn hafnaði þessari tillögu um að koma málinu í sáttafarveg þrátt fyrir að allir hagsmunaaðilar hafi kvartað sáran yfir skorti á samráði og upplýsingagjöf.

Lykilupplýsingar, á borð við kostnað, liggja ekki fyrir og í staðinn er þessi skýrsla sett fram í fumi og fáti. Í stað þess að leggja áherslu á samráð við foreldra og starfsmenn fá þeir ekki raunverulega aðkomu að vinnunni heldur er litið svo á að það sé meirihlutans að móta tillögurnar sem er síðan skellt út í borgina með óðagoti.“

Ekki sama hvernig hagrætt er

Aðspurður hvort Sjálfstæðismenn séu ekki fylgjandi því að hagræða í rekstri borgarinnar á niðurskurðartímum bendir Kjartan á að ekki sé sama hvernig það er gert.

„Sjálfstæðisflokkurinn hafði forgöngu um mikla hagræðingu í skólunum og annars staðar í borgarkerfinu á síðasta kjörtímabili. Þótt ég segi sjálfur frá, gekk sú vinna framar vonum enda var megináhersla lögð á gott samráð við starfsmenn og foreldra. Eðlilegt er að byggt sé á þessu starfi við frekari hagræðingu í borgarkerfinu, sem er nauðsynleg. Ég tel því sjálfsagt að skoða allar hugmyndir um frekari hagræðingu og sparnað í kerfinu með opnum og fordómalausum hætti. Ég gagnrýni hins vegar harðlega hvernig þessi vinna hefur farið fram.

Vegna þess hvernig staðið hefur verið að þessari vinnu er allt í uppnámi í borginni. Það er mikill órói og kvíði í borginni á meðal kennara, foreldra, starfsmanna leikskóla og frístundaheimila. Það er kolröng aðferðafræði að skella tillögum fram með þessum hætti. Þessar tillögur hefði átt að vinna miklu betur í samráði við hagsmunaaðila áður en slíkt er gert.“

Hætt við að reyndir starfsmenn hverfi á braut

Kjartan óttast að aðgerðirnar geti kostað skólakerfið fjölmarga reynda starfsmenn ef þær verða knúnar fram með þeim hætti, sem meirihlutinn virðist stefna að.

„Í skýrslunni eru ýmsar athyglisverðar tillögur, sem sjálfsagt er að skoða vel og vinna með í samráði við foreldra og aðra hagsmunaaðila. Það er hins vegar ekki sama hvernig slíkum markmiðum verður náð. Ég óttast t.d. að verði sameining leikskóla knúin fram með þessum hætti muni borgin missa margt hæft starfsfólk. Gert er ráð fyrir að yfirstjórn grunnskóla og frístundaheimila verði sameinuð. Sú tillaga hefur ýmsa kosti og það er sjálfsagt að skoða hana með jákvæðum hætti.

Við sjálfstæðismenn vorum í fararbroddi í hagræðingu á síðasta kjörtímabili og munum að sjálfsögðu taka þátt í umræðu um allar góðar tillögur. Við gagnrýnum hins vegar hvernig þetta hefur verið gert. Þetta hefur verið sett fram með þeim hætti að það er orðið mikið uppnám í skólakerfinu sem var ekki fyrir.“

Kjartan Magnússon Gúndi