Gunnar Rúnar Sigurþórsson. mbl.is/Golli

Ríkissaksóknari hefur ákveðið að áfrýja til Hæstaréttar Íslands dómi Héraðsdóms Reykjaness í máli ákæruvaldsins gegn Gunnari Rúnari Sigurþórssyni.

Er málinu áfrýjað í því skyni að Gunnar verði sakfelldur í samræmi við ákæru, hann dæmdur til refsingar og til greiðslu alls sakarkostnaðar.

Á þriðjudag sýknaði Héraðsdómur Reykjaness Gunnar Rúnar af refsikröfu ríkissaksóknara en dæmdi hann til að sæta öryggisgæslu á viðeigandi stofnun. Gunna Rúnar játaði að hafa orðið Hannesi Þór Helgasyni að bana í ágúst í fyrra en dómurinn komst að þeirri niðurstöðu að hann væri ekki sakhæfur.  

Fram kemur í tilkynningu frá ríkissaksóknara að niðurstaða héraðsdóms hafi verið sú að Gunnar hafi sökum geðveiki verið talin hafa verið alls ófær um að stjórna gerðum sínum á verknaðarstundu og hafi því sýknaður af kröfu ákæruvalds um refsingu.

Dómurinn hafi tekið til greina varakröfu ákæruvalds um að ákærða yrði gert að sæta öryggisgæslu á viðeigandi stofnun.

„Vegna sérstöðu málsins borið saman við önnur mál þar sem deilt hefur verið um sakhæfi telur ríkissaksóknari rétt að áfrýja málinu til Hæstaréttar til endurskoðunar á héraðsdómi. Má þar nefna að fyrir liggur að ákærði skipulagði verknaðinn með löngum fyrirvara, ákæruvaldið telur að orsakasamhengi á milli ástands ákærða og verknaðar sé óljóst og að lýsingar á háttsemi ákærða í skýrslum geðlækna og hans eigin framburði séu ekki í fullu samræmi við þær skilgreiningar sem byggt er á,“ segir í tilkynningunni.