Reykjavíkurflugvöllur. mbl.is/ÞÖK

Sjö þingmenn Sjálfstæðisflokks hafa lagt fram tillögu til þingsályktunar á Alþingi um að fela ríkisstjórninni að hefja viðræður við Reykjavíkurborg um breytingar á aðalskipulagi borgarinnar með það að markmiði að miðstöð fyrir innanlandsflug verði til frambúðar á Reykjavíkurflugvelli.

Fyrsti flutningsmaður tillögunnar er Jón Gunnarsson. Í greinargerð segir að brýnt sé að marka stefnu um framtíð Reykjavíkurflugvallar. Sú óvissa sem ríki um framtíð flugvallarins komi sér illa fyrir hagsmunaaðila. „Nú stendur yfir vinna við endurskoðun aðalskipulags Reykjavíkurborgar og því mikilvægt að Alþingi árétti vilja sinn í þessu mikilvæga máli. Vísað er til gildandi samgönguáætlunar sem gerir ráð fyrir áframhaldandi rekstri flugvallarins á núverandi stað og byggingu samgöngumiðstöðvar sem þjóni innanlandsfluginu. Jafnframt er vísað til samkomulags sem unnið hefur verið að á vegum samgönguyfirvalda og stjórnenda höfuðborgarinnar.“