Málmey er á leið úr Barentshafi.

„Þetta gekk mjög vel. Það er nógur fiskur þarna og hann er stór og fallegur,“ sagði Björn Jónasson, skipstjóri á Málmey frá Sauðárkróki, sem er að koma úr Barentshafi með um 900 tonn af þorski og ýsu.

Nokkur skip hafa verið við veiðar í Barentshafi síðustu vikurnar, en auk Málmeyjar hafa togararnir Venus, Þór Gnúpur og Sólbakur verið þar við veiðar. Björn sagði að öll skipin hefðu fengið mjög góðan afla.

Björn er ánægður með túrinn, en skipið kemur í landi á morgun. Eina sem skyggi á er að verð á þorski sé ekkert sérstaklega hátt. Túrinn skili sér hins vegar alveg vegna þess hversu mikið magn af fiski sé í lestum skipsins.

Málmey var um 20 daga að veiðum og er núna á heimleið. Björn sagði að siglingin heim væri búin að vera erfið, SV-stormur allan tíman. Venjulega tekur sigling úr Barentshafi þrjá sólarhringa, en að þessu sinni tekur siglingin  fjóra og hálfan sólarhring.

Eftir Smugudeiluna svokölluðu var gert samkomulag um að Ísland fengi kvóta í Barentshafi og hafa nokkur íslensk skip farið árlega í norska og rússneska lögsögu á grundvelli samningsins.