Aðstæður til leitar við Hrafntinnusker í gær voru mjög erfiðar, eins og sjá má af meðfylgjandi myndskeiði sem Þór Kjartansson tók. Á köflum var skyggni nánast ekkert. 

„Það var einstaklega erfitt að komast þarna uppeftir yfir daginn því þá rann allt saman í eitt í kófinu,“ sagði Þór. Auðveldara er að ferðast í slíku kófinu eftir að tekur að skyggja því þá sker ljóskeilan frá vélsleðanum sig í gegnum kófið.

„Það er mjög varasamt að reyna að komast i gegnum svona erfitt svæði eins og Hrafntinnuskerið er þar sem mikið er af hengjum og giljum. Það er erfitt og óþægilegt að fara um svæðið í slíkum veðurham þegar maður hefur ekki geislann af ljósinu,“ sagði Þór. Ljósgeislinn gerir t.d. kleift að sjá hvort hengiflug er framundan eða ekki.

Þór sagði að honum og félögum hans úr Flugbjörgunarsveitinni í Reykjavík, sem voru á vélsleðum, hafi sóst ferðin betur eftir að fór að skyggja. Þeir voru rétt á eftir snjóbílnum frá Flugbjörgunarsveitinni á Hellu sem fann týnda vélsleðamanninn. 

Þór og félagar hans aðstoðuðu vélsleðamann úr hópnum í Hrafntinnuskeri sem hafði farið fram af hengju og skilið sleðann eftir. Þeir mokuðu sleðann upp og komu honum af stað.

Vélsleðamaðurinn sem týndist varð viðskila við félaga sína og nam staðar uppi á hæð, þegar honum var ljóst að hann hefði tapað áttum. Hann lagðist í skjól við vélsleðann og beið eftir hjálp. 

Þegar björgunarsveitarmenn komu að manninum upp úr kl. 19.00 í gærkvöldi hafði hann beðið við sleðann í sjö og hálfa klukkustund. Manninum varð ekki meint af volkinu enda vel búinn og brást hann rétt við aðstæðum. 

Frásögn vélsleðamannsins