Lögreglan segir að þeir sem séu illa dekkjaðir eigi ekkert erindi út í umferðina. mbl.is/Kristinn

Umferðin á höfuðborgarsvæðinu hefur verið hæg í morgun en lítið hefur verið um óhöpp, þrátt fyrir mikinn snjó og hálku, að sögn lögreglu. Þá bendir lögreglan á að nú á ellefta tímanum sé gert ráð fyrir að dimm él gangi yfir höfuðborgarsvæðið.

Gert sé ráð fyrir að þau gangi yfir á um tveimur klukkustundum.

„Það er búið að ganga hægt en vel,“ segir Rúnar Sigurpálsson, varðstjóri í umferðardeild lögreglunnar á höfuðborgarsvæðinu, í samtali við mbl.is. Lítið hafi verið um óhöpp. 

Spurður út í moksturinn segir hann: „Okkur finnst ekki eins vel skafið og oft áður, en þetta er eiginlega fyrsti snjórinn í nokkuð mörg ár sem eitthvað kveður að.“

Rúnar hvetur alla ökumenn til að hreinsa vel af bílunum sínum áður en þeir leggja af stað út í umferðina. Sumir hreinsi t.d. illa af rúðunum og sjái þar af leiðandi illa út.

Þá segir hann að enn sjáist margir í umferðinni sem aki um á sumardekkjum. „Þeir sem eru mjög illa dekkjaðir ættu bara ekkert að fara af stað,“ segir hann.

Rúnar hvetur jafnframt alla ökumenn til að láta fjarlægja bílana sína verði þeir stopp. Ökumenn sjái sjálfir um að hringja í dráttarbíl.

Bílar sem séu skildir eftir geti skapað hættu. Sjáist þeir illa fyrir snjó geti þeir jafnvel orðið fyrir snjóruðningstækjum eða öðrum bílum. Rúnar segir að þetta séu ekki mörg tilfelli. „En það eru alltaf í umferðinni þessi tilfelli sem búa til vandræði,“ segir Rúnar og hvetur menn til að beita skynseminni.

Svona var umferðin á Miklubraut á tíunda tímanum í morgun. mbl.is/Kristinn