Þriggja daga fundur strandríkja við Norðaustur-Atlantshaf hefst í Ósló á morgun þar sem meðal annars verður reynt að finna lausn á deilum um makrílkvóta.  

Ísland, ESB, Færeyjar og Noregur taka þátt í fundinum í Ósló en Rússland hefur stöðu áheyrnaraðila. Þar verður þess freistað að ná samkomulagi um skiptingu veiðiheimilda á makríl og tryggja þannig heildarstjórnun makrílveiðanna.

Er þetta fyrsti fundur ríkjanna um málið frá því í lok nóvember þegar upp úr viðræðum slitnaði. Í kjölfarið tilkynntu íslensk stjórnvöld að þau ætluðu að halda óbreyttri hlutdeild í makrílveiðum á þessu ári, eða um 16-17% af raunverulegum heildarveiðum, sem þýðir 146.818 lesta veiði á þessu ári. Tilboð Norðmanna og Evrópusambandsins til Íslendinga var um að hlutur Íslands í makrílveiðunum á þessu ári yrði 3,1%.

Tómas H. Heiðar, aðalsamningamaður Íslands, segir að  Ísland muni á fundinum leggja sitt af mörkum til að þoka málum í átt að samkomulagi sem taki sanngjarnt tillit til lögmætra hagsmuna allra aðila.

Í því felist m.a. að tekið verði tillit til breytinga á göngumynstri og dreifingu makrílstofnsins en stofninn hafi á undanförnum árum í sífellt vaxandi mæli gengið til norðvesturs og inn í íslensku lögsöguna.

Segir Tómas að samkvæmt niðurstöðum sameiginlegra rannsókna íslenskra, norskra og færeyskra vísindamanna, hafi rúm milljón tonn af makríl, um 23% stofnsins, gengið inn í íslensku lögsöguna á fæðuöflunartímanum í fyrra, frá maí til september. Hafrannsóknastofnunin hafi sett fram það mat að makríll auki þynd sína yfir sumarmánuðina í lögsögunni um 59% en það hafi augljóslega umtalsverð áhrif á aðra mikilvæga fiskistofna, sem makríll á í samkeppni við, og lífríkið í heild.

Ian Gatt, framkvæmdastjóri samtaka skoskra uppsjávarfiskimanna, segir við skoska fjölmiðla í dag að hann voni að Íslendingar og Færeyingar hafi nú séð að sér og fulltrúar þeirra á fundinum í Ósló geri sér grein fyrir því að nauðsynlegt sé að ná samkomulagi um veiðarnar.