mbl.is/Brynjar Gauti

Skipulagsráð borgarinnar hefur samþykkti að fá faglegt álit á því hvort heimilt sé að færa sorpílát nær götu eins og lagt er til í útsendu bréfi frá Umhverfis- og samgöngusviði borgarinnar. Júlíus Vífill Ingvarsson borgarfulltrúi efast um að heimilt sé að færa sorpílát frá þeim stað sem gert er ráð fyrir í deiliskipulagi.

Í bréfi sem er að berast mörgum borgarbúum þessa dagana stendur að komast megi hjá því að greiða sorphirðugjald ef sorpílátagerði eða sorpílátageymslur eru varanlega færð nær götu. Nýtt sorphirðugjald sem eru 4.800 krónur á ílát miðast við að sorpílát inn á lóð séu meira en 15. metra frá sorpbíl. Ekki er greitt sorpílát ef ílát eru nær en þessu nemur.

„Mér sýnist málið bara ekki svona einfalt. Í byggingarreglugerð og ýmsum deiliskipulagsáætlunum má víða finna skýrar reglur varðandi staðsetningu sorpíláta. Þar að auki er spurning um hver eigi að bera kostnað sem hlýst af slíkum tilfæringum. Tæplega er sanngjarnt gagnvart húseigendum að kveða á um staðsetningu sorpíláta í byggingarleyfi og koma svo fyrirvaralaust og rukka um aukagjald sem byggir á staðsetningu þessara sömu sorpíláta. Eðlilegt hefði verið að skipulagsráð hefði fjallað um málið áður en það var afgreitt og það fengi vandaðri meðferð,“ segir Júlíus Vífill.