Héraðsdómur Reykjavíkur. mbl.is/Þorkell

Héraðsdómur Reykjavíkur hefur dæmt 35 ár gamlan karlmann í 4 mánaða skilorðsbundið fangelsi fyrir að ráðast á konu, með þeim afleiðingum að hún fingurbrotnaði og rifbrotnaði og hlaut fleiri áverka.

Maðurinn réðist einnig á mann í húsinu og skallaði hann, sparkaði í hann, sló og beit með þeim afleiðingum meðal annars að hann rifbrotnaði.

Maðurinn fór inn í hús fólksins. Konan, sem hann réðist á, er mágkona hans en eiginkona hans og sonur voru einnig í húsinu þegar þetta gerðist. 

Í dómnum er vitnað í lögregluskýrslur þar sem kemur fram, að þegar lögregla kom á staðinn mættu þeir manninum við útidyrnar á húsinu. Maðurinn hélt á ungum syni sínum og var  mjög blóðugur á fötum og höndum og með greinileg sár á hnúum og fingrum.

Lögreglumenn tóku drenginn í sínar hendur og komu honum í skjól. Fram kom í skýrslu lögreglu, að fólkið hafi verið í mikilli geðshræringu og erfitt að henda reiður á því hvað hefði átt sér stað. Mikið af glerbrotum hafi verið utan við húsið og tvær rúður brotnar í útidyrahurð.

Maðurinn var æstur og illviðráðanlegur og hafi hann og konurnar hrópað hvert á annað. Þrjú börn voru þarna líka og voru skelkuð og grétu mikið.

Í íbúðinni var mikið blóð, m.a. á gólfi og í sæng, og einnig á gólfum og veggjum á stigagangi. 

Fram kom að kona mannsins hafði dvalið hjá systur sinni í nokkra daga vegna ágreinings við manninn. Hann hafi síðan hringt í hana og sagst ætla að sækja hana. Maðurinn sagði, að þegar hann kom inn í húsið hafi hann hitt fyrir annan mann, sem hann var mjög ósáttur við og hefði bannað konu sinni að tala við.   

Árásarmaðurinn var dæmdur til að greiða mágkonu sinni og manninum bætur.