Tómas Már Sigurðsson, forstjóri Fjarðaáls, átti fund með stjórnendum Alcoa í Bandaríkjunum í gær.

Engar nýjar ákvarðanir voru teknar á fundi sem Tómas Már Sigurðsson, forstjóri Alcoa-Fjarðaál, átti með stjórnendum Alcoa í Bandaríkjunum í gær. Á fundinum var fjallað um undirbúning undir byggingu álvers á Bakka við Húsavík.

Erna Indriðadóttir, upplýsingafulltrúi Alcoa-Fjarðaáls, segir að þetta hafi verið vinnufundur þar sem m.a. hafi verið fjallað um áform Alcoa að byggja álver á Bakka. Engar ákvarðanir hafi verið teknar á fundinum og Alcoa hafi áfram áhuga á að byggja þar álver.

Unnið hefur verið að undirbúningi undir byggingu álvers við Húsavík í fimm ár. Forstjóri Landsvirkjunar hefur lýst því yfir að ekki sé nægilega orka í Þingeyjarsýslu til að byggja álver af sömu stærð og álver Fjarðaáls á Reyðarfirði, en hefur ekki útilokað að byggt verði minna álver. Hann hefur jafnframt tekið fram að fleiri aðilar hafi sýnt því áhuga að nýta orku sem er á svæðinu.