Vetrarfærð er víða um land. Rax / Ragnar Axelsson

Útlit er fyrir áframhaldandi éljagang og skafrenning norðan- og norðaustanlands fram á nóttina, en dregur þó nokkuð úr fjúki og éljum  með kvöldinu vestantil á Norðurlandi og eins á leiðinni vestur í Dali og norður í Ísafjarðardjúp, samkvæmt ábendingu veðurfræðings.

Það er vetrarfærð á Suðurlandi, víða nokkur hálka eða hálkublettir. Hálka er á Sandskeiði og hálkublettir á Hellisheiði, hálkublettir og skafrenningur eru í Þrengslum á Reykjanesbraut og Kjalarnesi.

Á Vesturlandi er hálka, hálkublettir eða snjóþekja á flestum vegum og einhver skafrenningur. Á Vestfjörðum er víðast hvar hálka, snjóþekja og skafrenningur. Hálka og skafrenningur er á heiðum.

Á Norðurlandi er hálka, snjóþekja, éljagangur og skafrenningur. Þungfært er um Hólasand. Á Austurlandi eru víða hálkublettir og éljagangur, þó er skafrenningur á Fagradal og þæfingsfærð og skafrenningur á Fjarðarheiði.

Á Suðausturlandi eru hálkublettir frá Öræfum og vestur úr.