Orator, félag laganema við Háskóla Íslands, bar í gærkvöld sigurorð af Mágusi, félagi viðskiptafræðanema við Háskóla Íslands, í hinum árlegu Orator/Mágus-leikum. Er þetta ellefta árið í röð sem Orator vinnur leikana en sumar heimildir herma að þetta sé hið tólfta.

Félögin öttu kappi í fótbolta, körfubolta, spurningakeppni, skák, reiptogi og fleiru. Síðasta keppnisgreinin var ræðukeppni og þegar hún hófst var staðan jöfn, sex stig gegn sex. Orator bar sigur úr býtum með  og urðu lokatölur því 9:6 fyrir Orator.

Að sögn Williams Freys Huntingdon Williams, stjórnarmeðlims Orators, voru leikarnir óvenjuvel sóttir í ár og afar spennandi og jafnir framan af. Einna svartast var útlitið fyrir Orator þegar stjórnir félaganna tókust á í knattspyrnu en Mágus burstaði Orator 5:0. Mágus vann einnig stórsigur í körfuknattleik kvenna.

Þó félögin takist á í mesta bróðerni hafa leikarnir hafa skapað nokkurn ríg milli þeirra og hefur það kristallast í góðlátlegum hrekkjum á báða bóga. William segist hafa fengið veður af því óþekktur laganemi hafi í gærkvöld haft Ref Mágusar, lukkudýr félagsins, á brott með sér. Hópur laganema framdi sama hrekk fyrir tveimur árum og í fyrra nöppuðu Mágus-liðar Orator/Mágus-verðlaunagripnum frá Orator.

Grágás, lukkugæs og verndari Orators, slapp naumlega við brottnám en William og Steinar Örn Steinarsson, laganemi, tóku hana undir sinn verndarvæng þegar leið á kvöldið og óku henni heim.